Актаныш автотранспорт хуҗалыгы — район халкына уңайлы хезмәт күрсәтә

Хуҗалык карамагында Казан һәм Чаллы шәһәрләренә һәм авылларга йөрүче маршрутлар эшли. 9 муниципаль маршрут авылларга юл тота — алар район халкын көндәлек кирәк-ярак эшләренә, мәктәпләргә, медицина учреждениеләренә илтә. Шулай ук 19 мәктәп маршруты һәм 3 заказлы җиңел автомобиль даими рейслар башкара.
Барлыгы 33 автобус һәм 6 җиңел автомобиль исәптә тора. Водительләрнең күбесе — тәҗрибәле, озак еллар транспорт өлкәсендә эшләүчеләр.
Пассажирлар өчен барлык уңайлыклар да тудырылган. Билетлар паспорт белән рәсмиләштерелә, мәгълүмат бердәм базага кертелә. Барлык пассажирлар иминиятләштерелә. Казан маршруты атнага ике тапкыр йөри: сәгать 4:00тә Актаныштан кузгала, ә Казаннан сәгать 15:00тә чыгып, кичке 20:00дә кире кайтып җитә.
Хуҗалык эшчәнлегенә карата халык тарафыннан зарлар юк — хезмәт күрсәтү сыйфаты канәгатьләнерлек дәрәҗәдә.
Алда торган һөнәри бәйрәм — Автомобильчеләр көне уңаеннан, ТР атказанган автотранспорт хезмәткәре ООО Автотранспорт хуҗалыгы җитәкчесе Әлхәт Рәхмәтуллин барлык хезмәттәшләрен һәм шофёрларны бәйрәм белән котлады:
“Барлык автомобильчеләрне чын күңелдән бәйрәм белән тәбриклим! Эшегездә имин юллар, нык сәламәтлек, гаилә иминлеге телим,” — диде ул.
Актаныш автотранспорт хуҗалыгы — районның хәрәкәтен тәэмин итүче ышанычлы терәк, халкыбызга көн дәвамында хезмәт итүче оешма булып тора.