Чөгәнә авылында Бөек Җиңүгә багышланган митинг узды

Бөек Җиңү көне — илебез тарихындагы иң әһәмиятле даталарның берсе. Еллар узса да, сугыш китергән кайгы-хәсрәт, халкыбызның батырлыгы һәм фидакарьлеге онытылмый.

Бүген инде Бөек Ватан сугышын үз күзләре белән күргән ветераннарыбыз арабызда калмады. 81 ел — зур вакыт аралыгы. Әмма Җиңү көне һаман да хәтер, хөрмәт һәм рәхмәт көне булып яши. Бу көн — батырларны искә алу, тарихны барлау һәм нәтиҗәләр ясау көне.

Митинг барышында сугыш кырында ил азатлыгы өчен көрәшкән фронтовиклар, тылда көнне-төнгә ялгап хезмәт иткән тыл хезмәтчәннәре искә алынды. Чарада катнашучылар һәйкәл янына чәчәкләр салдылар, батырлар истәлеген бер минут тынлык белән хөрмәтләделәр.

Хөрмәтле тыл хезмәтчәннәре, сугыш чоры балалары, өлкән буын вәкилләре! Сезне чын күңелдән Бөек Җиңү бәйрәме белән котлыйбыз. Илебезнең тынычлыгы өчен куйган хезмәтегез, сабырлыгыгыз һәм батырлыгыгыз өчен зур рәхмәт белдерәбез.

Безнең буын, тыныч күк йөзе астында яшәве өчен, фронтта көрәшкән батыр солдатлар алдында да, тылда армый-талмый хезмәт иткән кешеләр алдында да чиксез бурычлы. Аларның батырлыгы һәм ныклыгы яшь буын өчен һәрчак үрнәк булып калачак.