Татарстанда дала һәм кыр киекләренә ау сезоны тәмамланды

Республика территориясендә дала һәм кыр киекләрен аулау тыела. Татарстан Республикасы Биологик ресурслар буенча Дәүләт комитеты матбугат хезмәтендә сөйләүләренчә, аучыларга хисап тапшыру срокларын төгәл үтәү зарурлыгына аерым игътибар бирергә кирәк. Нәтиҗәләр турындагы мәгълүматны сезон ябылганнан соң 20 көн эчендә рөхсәт алынган оешмага тапшырырга кирәк.

Шуны истә тоту мөһим: хисаплар тапшыру вакытын бозу яки мәгълүматлар бирмәү җитди нәтиҗәләргә китерәчәк. Мондый хокук бозуларга юл куйган гражданнар теләсә нинди аучылык ресурсларын аулауга бер елга рөхсәт алу хокукыннан мәхрүм ителәчәк.