Татарстанның Экология министрлыгы вәкилләре Югары Яхшый мәктәбенә килде

Югары Яхшый төп гомуми белем бирү мәктәбендә балаларга экологик белем һәм тәрбия бирү юнәлешендә шактый эш башкарыла.

 Алар мәктәпнең экология юнәлешендә башкарган эшчәнлеге белән таныштылар, фикерләре белән уртаклаштылар. География-биология укытучысы Рәзилә Ринас кызы җитәкчелегендә укучылар күп кенә конкурсларда катнашып, алдынгы урыннарны яулыйлар. ТР Экология министрлыгының экологик белем бирү бүлегенең 1 нче разрядлы белгече Марислова Юлия Олег кызы белән берлектә экодәрес уздырылды, презентацияләр күрсәтелде.

Төрле конкурсларга катнашырга өндәде, кайберләре белән якыннанрак таныштырды. Аннары чара табигатьтә дәвам итте. “Табигать белгечләре” дип исемләнгән квест-уен оештырылды. Балалар төрле станцияләрдә биремнәр башкардылар. Дәүләт инспекторлары Идрисов Руслан Альфрид улы, Мөхәммәтшина Эльвира Салихҗан кызы да үзләренең җылы фикерләрен җиткезделәр, эшчәнлеккә яхшы бәя биделәр. Алар «Росприроднадзор»ның рәхмәт хатын тапшырып киттеләр.

Чара бик күңелле, мавыктыргыч иң мөһиме- файдалы булды.