Райондашыбызга тәртибенә күрә җәзасы

Соңгы тикшерүләрнең берсендә автоинспекторлар шикләнеп Р. Ш. Курмаков идарә иткән автомобильне туктата. Йөртүченең исерек булуы күренеп тора. Бу кешегә медицина тикшерүе ясала һәм беркетмә төзелеп, ул җәмәгать судына җибәрелә.

1 апрельдә гражданин Курмаков Ринат Шәйхем улына карата РФ Административ хокук бозулар кодексының 12.8 статьясының 1 өлеше буенча административ хокук бозу турындагы эш буенча ачык суд утырышы узды. 

Татарстан Республикасы Актаныш суд районы буенча 2 нче суд участогы җәмәгать суды карары белән гражданин Р.Ш. Курмаков административ хокук бозуда гаепле дип танылды һәм 1 (бер) ел һәм 6 (алты) айга автомобиль белән идарә итү хокукыннан мәхрүм ителде, 30 000 (утыз мең) сум күләмендә административ штраф салу рәвешендә административ җәза билгеләнде.

Материал Актаныш муниципаль районы юл хәрәкәте иминлеге комиссиясе ярдәмендә әзерләнде.