Мәйсара Хәбировадан шигъри гөлләмә

Әбиләр чуагы
Яшел дә кызыл агачлар,
Яшел дә сары...
Әбиләр чуагының иң,
Иң матур чагы.

Җәйдәй җылы. Кояшның да 
Ягымлы чагы.
Табигатьнең җиргә яфрак
Түшәгән чагы.

Тирә —юньнең серле чагы.
Тылсымлы чагы.
Көзнең — әбиләр чуагы.
Чын көяз чагы.

***

Дөнья көтәбез
Багышланган гомер — шушында.
Берәмтекләп җыйган — шушында.
Тән саулыгы, бар да — шушында.
Гомер иткән газиз йортыңда.

Күз-колакка күрше калдырып,
Китсәк, кайтыш, ашыгып-ашыгып.
Шул рәвешле гомер итәбез.
Чат ябышып, дөнья көтәбез.