Рөстәм Миңнеханов Түбән Кама белән Чаллыны әйләнеп үтә торган автомобиль юлын тикшереп, машинада йөреп карады

81 километр озынлыгындагы трасса «Сыйфатлы һәм имин юллар» илкүләм проекты буенча төзелә һәм М7 «Волга» автомобиль юлының яңа юнәлеше булып тора. Киләчәктә әлеге участок Казан – Екатеринбург – Төмән тиз йөрешле маршрутының бер өлеше булачак. Хәзерге вакытта планлаштырылган өч этапның икесендә эшләр тәмамланган.

«Волго-Вятскуправтодор» федераль казна учреждениесе башлыгы Илдар Минһаҗев Татарстан Рәисенә башкарылган эшләр турында хәбәр итте. Ул билгеләп үткәнчә, икенче этап кысаларында бик күп ясалма

корылмалар (транспорт чишелешләре, юл үткәргечләр, сигез күпер) төзелгән. Юл чишелешләрендә яктырткычлар урнаштырылган, полосалар металлдан ясалган ике яклы барьер киртәләр белән бүленгән.

Халыкка уңайлы булсын өчен Сарсаз-Блин, Шәңгәлче, Кәрәкәс торак пунктлары янында тавыштан саклый торган экраннар куелган, ә урман массивларын кисеп үтә торган участокларда кыргый хайваннардан саклану өчен коймалар тотылган. Хәзер икенче этапта кюветлар урнаштыру һәм рекультивация эшләре ахырына якынлаша. Юлда җир эшләре тәмамланган.

Моннан тыш, юл «киемен» урнаштыру, асфальт-бетон түшәмә җәю эшләре дә ахырына якынлаша. Юл нык булсын өчен, материал 23 сантиметр калынлыктагы өч катлам итеп түшәлә.

Әйләнеч юл составына 10 күпер, 11 юл үткәргеч һәм төрле дәрәҗәдәге биш юл чаты керә. 14 ясалма корылмада түшәмәнең өске катламы җәелгән инде. Аларның иң озыны – Кама елгасы аша күпер. Хәзерге вакытта эшчеләр култыкса һәм барьер киртәләр, яктырткычлар (һ.б.) урнаштыру белән шөгыльләнә. Соңыннан объектта юл билгеләре һәм сызыклар барлыкка киләчәк.

Нәтиҗә ясап, Рөстәм Миңнеханов әлеге юлны федераль масштабтагы стратегик проект дип атады, ул төбәктә транспорт үтемлелеген арттырыр һәм Кама кластерын үстерүгә этәргеч бирер дип көтелә.

Тулырак: https://tatar-inform.tatar/news/minnexanov-tuban-kama-belan-callyny-ailanep-uta-torgan-yulny-karady-ham-yana-yul-builap-uzdy-5895908