Кашкарыйның орлыгын ничек җыярга?

Кашкарыйның орлыгын үзегез дә әзерли аласыз. Моның өчен иң эре, иң матур чәчәкне сайлап алырга һәм ян сабакчаларын сындырырга кирәк. Аның төп эре чәчәкле сабагы гына калсын. Шул очракта үсемлекнең бар көче орлыкларын өлгертүгә китәчәк. Чәчәге шиңә башлауга, орлыгы коелмасын өчен, марля яки бик тыгыз булмаган тукыма кисәге белән бәйләп куегыз. Орлыгы өлгергәч, тамыры белән йолкып алып, коры урында киптерергә һәм орлыкларны кәгазь яки тукыма кисәгенә төреп сакларга кирәк. Кайчан җыелуын, төсе һәм сортын тамгалап куярга онытмагыз.