1 октябрьдән Татарстанда берничә категория пенсионерның түләүләре артачак. Өстәмә акча 80 яшькә җиткән гражданнарга, хезмәткә яраксыз туганнарын карап тотучы пенсионерларга, шулай ук элекке хәрбиләргә һәм көч структуралары ветераннарына биреләчәк.
80 яшь тулган пенсионерлар
Сентябрь аенда 80 яшь тулган пенсионерларга 1 октябрьдән иминият пенсиясенең билгеләнгән өлеше яңадан исәпләнәчәк. Шул ук вакытта I төркем инвалидларына да якынча 10 мең сум күләмендә өстәмә түләү каралган.
Әмма бер үк нигез буенча ике тапкыр өстәмә түләү билгеләнми. Әгәр пенсиягә өстәмә акча I төркем инвалидлыгы сәбәпле инде билгеләнгән булса, 80 яшь тулгач, түләү икенче тапкыр арттырылмаячак.
Хезмәткә яраксыз туганнары булган пенсионерлар
Тагын бер төркемгә — карамагында хезмәткә яраксыз туганнары булган пенсионерларга да өстәмә түләү каралган. Мәсәлән, пенсионер карамагындагы балигъ булмаган балалар яки оныклар өчен түләү билгеләнергә мөмкин.
Көндезге бүлектә укуын дәвам итүче кешеләр өчен дә бу хокук 23 яшькә кадәр саклана.
Бер иждивенец өчен өстәмә түләү күләме пенсиянең билгеләнгән өлешенең өчтән бер өлешен тәшкил итә. Өстәмә түләү иң күбе өч гаилә әгъзасы өчен билгеләнә ала.
Әгәр иждивенец пенсионерга пенсия рәсмиләштерелгәннән соң барлыкка килгән булса, өстәмә түләү алу өчен Социаль фондка мөрәҗәгать итәргә кирәк.
Элекке хәрбиләр һәм көч структуралары ветераннары
1 октябрьдән элекке хәрбиләрнең һәм көч ведомстволары ветераннарының пенсияләре дә артачак. Аларның пенсия белән тәэмин ителеше 4 процентка индексацияләнә.
Түләүләр Татарстанда яшәүче һәм пенсия белән тиешле ведомстволар линиясе буенча тәэмин ителүче гражданнарга кагыла.
Нет комментариев