Ышаныч һәм иминлек
Ләйсән Мөхәммәтова: Балаларга яктылык кайтаргыч элементлар хакында ачыктан-ачык аңлатабыз, моның өчен күңелле чара оештырабыз
Җәйге каникуллар вакытында Актаныш районы буенча ЮХИДИ профилактика бүлеге балаларның юл-транспорт травматизмын кисәтү максатыннан бик күп чараларны гамәлгә куйды. Ә менә чираттагысы кич көне, караңгы төшкәч үткәрелде. Ник дисезме?!
Әлеге чара — яктылык кайтаргыч элементларга багышланды. Юл хәрәкәте куркынычсызлыгын пропагандалау чарасы Актанышның «Бүләк» аланында ял итүче 4 агымдагы балалар өчен гамәлләштерелде.
Әңгәмәләр, акцияләр, тематик уеннар, ярышлар оештырды.
— Сөендек, укучылар барысы да юл хәрәкәте кагыйдәләрен беләләр, яктылык кайтаргыч элементлы киемнәрдә алар флешмоб биеделәр. Балалар шушы элементларның никадәр мөһим булуын яхшы аңлый.
Юл хәрәкәтен профилактикалау буенча чаралар балалар бакчаларында һәм лагерьларда даими үткәрелә, уен алымнары ярдәмендә балаларга юлда үзүзеңне тотуның төп кагыйдәләрен истә калдыру җиңелрәк, — дип сөйләде «Актаныш-информ» журналистына ЮХИДИ Актаныш районы буенча профилактика бүлеге җитәкчесе Ләйсән Мөхәммәтова.
Әлеге профилактик эшчәнлекнең әһәмияте әйтеп бетергесез зур һәм көчле! Тиздән көзгә дә керәбез, балаларыбыз мәктәпләргә бара, ә менә кич кайтканда яки берәр түгәрәккә барганда бу элементларның аларда булуы юл һәлакәтләренә юл куймас! Шофёрлар газизләребезне әллә каян күреп торачаклар бит.
Следите за самым важным и интересным в Telegram-каналеТатмедиа
Нет комментариев