Авылыма кайтып барышым. Резеда Нуртдинова
14 февраля 2022, 08:39
Мин - Пучы авылыннан Резеда Нуртдинова. "Туган авылым минем" бәйгесенә шигыремне тәкъдим итәм. Үзем Пучыда яшәсәм дә, туган авылым - Мөслим районы, Исәнсеф авылы. Шигырем дә Исәнсефкә багышланган.
Исәнсефем
Менә кабат өзелеп сагынудан
Авылыма кайтып барышым.
Синдә генә күңел тынычлана,
Тараладыр кайгы-сагышым.
Синдә генә ләззәтләнә җаным,
Синдә генә күңел очына.
Кайтып киләм менә, Исәнсефем,
Синдә үткән бала чагыма.
Сагынылган, өзелеп сагынылган
Сукмалары балачагымның,
Чыр-чу килеп, тупырдашып үскән,
Йөгерешкән нәни чагымның.
Сагындырган сулар чәчрәтеп,
Кенәзләрдә сулар керүләр,
Көтүлектә, буа буйларында
Көннәр буе көтү көтүләр.
Көтудэн сон авыл башларында
Сагындырган туплар тибүләр,
- Сагындырган һәр балачак төсе,
Шат авазлар, уйнау-көлүләр...
Сагындырган туган нигез төсе,
Әнкәемнең кайнар бәлеше,
Сагындырган тәртипсезлек өчен
Әткәемнең биргән өлеше...
Кайтып киләм менә сагынудан –
Балачакка кайтып барышым.
Каршыла син мине, Исәнсефем,
Тарат минем кайгы-сагышым.
Нет комментариев