ХАЛЫК БӘЙРӘМЕ: Бүген 57 бистәдә яшәүчеләр үз чыршыларының утын кабызды

57 бистә Актанышның иң күп халык яши торган  өлешенә әйләнде.

Монда 20-30 ел элек өй салып төпләнгәннәр дә, әле шушы елларда гына йорт-җир тергезгән гаиләләр дә яши.

Быел актив авылдашлар үзара киңәшеп бистәдә чыршы куярга уйладылар. Иганәчеләр дә үзләре, яшел гүзәлкәйне алып кайтучылар, матур итеп ут-гирляндалар куючылар да.

Бүгенге чыршы ачу тантанасын ике Сиринабыз- алып баручы Сирина Шәехова һәм җырчы-сандугач Сирина Исламовалар оештырды.

Дәртле җыр-биюләр, уен-бәйгеләр гөрләгәндә җыелган халыкны яраткан Кыш бабабыз-Рөстәм Мусин да килеп котлады. Кышкы каникулдагы балалар, мәктәпкә барасы, дәресләр әзерлисе булмагач, рәхәтләнеп тау шуды, әти-әниләре янына килеп татарча биюләргә дә кушылдылар.

Мондый халык өчен оештырылган бәйрәм һәркемгә бик ошады, авылдашлар нәкъ шушы урында тагы да очрашуларда күрешергә сүз куешты.