Нәфис Сәлимгәрәев авыл хуҗалыгы тармагында хезмәт куючы гүзәл затларга рәхмәтен белдерде

Ләйсән ГАЗИЗОВА, 4 март 2024 - 14:08

2784

Актаныш- авыл хуҗалыгы районы буларак билгеле төбәк. Әлбәттә, һәр тармактагы кебек үк биредә дә гүзәл затларыбыз-хатын-кызлар тырыш хезмәтләрен куя. Аларның саны 700 гә якын.

Нәфис Сәлимгәрәев авыл хуҗалыгы тармагында хезмәт куючы гүзәл затларга рәхмәтен белдерде

Бүген Әлфия Авзалова исемендәге район мәдәният сараенда 8 март бәйрәме уңаеннан тантаналы чара оештырылды. Авыл хуҗалыгы һәм азык-төлек идарәсе башлыгы Нәфис Сәлимгәрәев залдагы барлык хатын-кызларны изге теләкләр белән котлаганнан соң игенчелек, терлекчелек, хисап юнәлешендә югары эш күрсәткечләренә ирешкәннәрне бүләкләде. Склад мөдире Илүзә Ханнанова, "Нигез" ҖЧҖ терлекчесе Равилә Имамовага авыл хуҗалыгы азык-төлек идарәсенең мактау кәгазен, "Саф" ҖЧҖ ферма мөдире Алсу Сибгатуллинага авыл хуҗалыгы азык-төлек идарәсенең рәхмәт хатын тапшырды.

- Хөрмәтле хатын-кызлар, әниләр, әбиләр, апалар, кызлар! Яз белән хатын-кыз охшаш. Алар дулкынландыра, йөрәкләрне җилкендерә, матурлыкка чакыра. Сезне язның беренче бәйрәме белән котлыйм. Без ир-атлар барлык эшләгән эшләребезне сезнең күңел булсын өчен башкарабыз. Сез- безгә илһам бирәсез, рухландырасыз. Сез-безнең иң кадерле кешеләребез. Йөзегездән елмаю китмәсен, гаиләгездә тигезлек булсын, теләгән теләкләрегез тормышка ашсын!- диде Нәфис Әзһәм улы.

Нәфис Сәлимгәрәев авыл хуҗалыгында хезмәт куючы хатын-кызларның республикакүләм бәйгеләрдә сынатмыйча, мактаулы урыннарга ирешүләрен билгеләп үтте. "Ел ир-аты: хатын-кыз карашы» бәйгесенең зона этабында җиңү яулап, республикакүләмендә дә беренчелеккә ирешкән "Башак" хуҗалыгы савымчысы Миләүшә Хәмәдуллинаның, савымчылар бәйгеләрендә җиде ел рәттән призлы урыннар алган сыер савучыларның районыбызның горурлыгы булуын әйтте.