Татарстанның Бөгелмә шәһәрендәге А.Д. Губин исемендәге балаларны савыктыру лагеренда көзге ял сменасы вакытында фаҗига булган. Менингококк инфекциясенең яшен тизлегендә үсүче формасы аркасында 12 яшьлек кызның гомерен саклап кала алмаганнар.
1 ноябрь кичендә дүртенче отрядта ял итүче 12 яшьлек кыз лагерьның медицина пунктына башы нык авыртуга һәм тән температурасының 39,4 градуска кадәр күтәрелүенә зарланып мөрәҗәгать иткән. Медицина хезмәткәрләре бу хакта ата-анасына хәбәр иткән. Шул ук кичне, 21:05 сәгатьтә, әти-әнисе баланы өйләренә алып киткән.
2 ноябрьдә кызның хәле кискен начарланган. Ата-анасы ашыгыч медицина ярдәме чакырткан. Башта баланы Бөгелмә балалар хастаханәсенең йогышлы авырулар бүлегенә китергәннәр, аннары ашыгыч рәвештә Лениногорск үзәк район хастаханәсенең реанимация бүлегенә күчергәннәр.
Аңа ярдәм күрсәтү өчен Республика балалар клиник хастаханәсеннән табиб-реаниматолог та җәлеп ителгән. Табиблар интенсив дәвалау үткәргән, кызны үпкәләрне ясалма вентиляцияләү аппаратына тоташтырган, башка реанимация чараларын кулланган. Әмма, медицина хезмәткәрләренең тырышлыгына карамастан, 2 ноябрьдә 17:15 сәгатьтә баланың үлеме теркәлгән.
Лениногорск үзәк район хастаханәсе мәгълүматлары буенча, алдан куелган диагноз — менингококк инфекциясенең яшен тизлегендә үсүче формасы, менингококкцемия (бактерияләр китереп чыгарган сепсис) һәм Уотерхаус — Фридериксен синдромы.
Лагерьда ял итүчеләр медицина күзәтүе астында
Татарстан Республикасы Яшьләр эшләре министрлыгы мәгълүматларына караганда, сменада катнашкан балаларның барысы да Роспотребнадзорның Татарстан Республикасы буенча идарәсе һәм Бөгелмә үзәк район хастаханәсе белгечләре күзәтүенә алынган. Мәрхүм кыз белән бер отрядта булган балаларга вакцинация үткәрү каралган.
Вакыйга Татарстан Республикасы Яшьләр эшләре министрлыгының аерым контролендә тора.
Мәрхүм баланың туганнарының һәм якыннарының авыр кайгысын уртаклашабыз.
Нет комментариев