Булачак авыл хуҗалыгы белгечләре махсус хәрби операциядә көрәшүчеләрдән үрнәк ала

Раил Надриев истәлегенә оештырылган хәрби-патриотик ярышлар якташыбыз, Советлар Союзы Герое Баян Дәүләтов исемендәге үзәк стадионда дәвам итте.

Актаныш технология техникумы студенты, программистлыкка укучы Рәмис Миршәрипов үзенең ярышка җиңәргә килүен әйтте. Волейбол, чаңгы спорты белән шөгыльләнүче егет турникта да оста тартыла:

Бүген 19 тапкыр турникта тартылдым. Бу чаралар бик кирәк. Армия сафларына бару өчен тренировка, әзерлек булып тора.

Артур Ганиев Башкортостанның Илеш районы Яркәй авылындагы Дуван филиалы техникумы җир белгече булырга әзерләнә. Командаларына 1 курсның иң көчле студентларын сайлап алып килгәннәр. Биредә тагы да булдыклырак яшьләр белән танышуын әйтте ул:

-Ярышлар гадел үтә, берәү дә харәмләшми, монысы иң әһәмиятлесе. Раил Надриев истәлегенә бур ярышлар өченче тапкыр үткәрелә, киләчәктә дә бу чара тукталмасын,- ди Артур.

Мөслим районы күппрофильле техникумының авыл хуҗалыгы техникаларын, җиһазларын эксплуатацияләү һәм төзекләндерү бүлегендә укучы Әмир Гәрәев турникта тартылды, икенче урынга лаек булуы белән ул бик горурлана:

Бар студентлар да тырыша, алар бер-берсенә көндәшләр түгел, ә дуслар. Миңа монда бик ошый, – ди күршебез. 

 Команда составында 5 студент, алар автомат сүтеп-җыю, 100 метрга йөгерү, турникта тартылу, җирдән этелү, гер күтәрү, кул көрәштерүдә көч сынашты һәм команда белән аркан тартышты. Җиңүчеләргә техникум җитәкчеләре әзерләгән бүләкләр тапшырылды. Раил надриевның әтисе Марсель дә иганәчелек күрсәткән, алдынгы спортчыларны медальләр белән хөрмәтләде.