Кул кушырып утырмыйбыз

Районда һәркем махсус хәрби операциядә катнашучыларга ярдәм кулы сузарга тырыша. Киң күңелле райондашлар егетләрнең исән-имин әйләнеп кайтуларын якынайтыр өчен үз өлешен кертергә ашыга. Кемдер оекбаш бәйли, кемдер акчалата ярдәм итә, кемдер үзеннән җылы киемнәр арттыра. Ә менә Богады мәктәбенең 8нче сыйныфында укучы кызлар мобилизацияләнгән егетләргә токмач кисү акциясенә кушылды.

- Районкүләм оештырылган “Токмач кисү” акциясенә Богады мәктәбе укучылары бик теләп кушылды. 8 класс кызлары технология дәресендә өлешчә мобилизациядәге абыйларына дип 10 җәймә (5 кап) токмач басып, җыйнау ноктасына илтеп тапшырдылар. Кызлар әлеге гамәлләре белән эшкә осталыкларын да күрсәттеләр, солдатларыбызның исән-сау туган якларына әйләнеп кайтсыннар дип, изге теләкләрен дә җиткерделәр, дип безгә хәбәр итте технология буенча мөгаллимә Лениза ханым Фәттахова.

Афәрин, кызлар! Әлеге изге гамәлләрегез җиңүне якынайтуда матур  өлеш булсын.