СВОдан рәхмәт сүзе: Әтәс өлкәннәре фронттагы якташларны 24 маскировка челтәре белән сөендерде

Бердәмлектә – көч!

Әтәс авыл җирлеге өлкәннәре «Изге Ай» исемле төркем булдырып, бердәмләшеп маскировка челтәрләре үрә башлаган. Бу эшкә Чат һәм Бикчәнтәй авылларының өлкәннәре дә кушыла. Бүгенге көндә алар 24 челтәрне үреп бетергән.

Һәр челтәрне төргәкләгәндә эченә егетләргә кирәк-яраклар да тыгып җибәрәләр Фотосурәтләр, хатлар салалар. Аларга изге теләкләрен язып, челтәрләрне төйнәп җибәрәләр.

Токмач кисүдән алып окоп шәмнәренә кадәр

Әтәслеләр «Токмач кисү» акциясенә дә актив кушылды. Алар күп мәртәбәләр солдатларга коры ашлар ясар өчен өй токмачлары кисте. Шулай ук окоп шәмнәре, фонарьлар җыеп фронтка озаттылар.

Бүгенге көндә дә бу изге эшләр дәвам итә. Һәр көн – яугирләребезгә ярдәм итүнең яңа мөмкинлеге.

Егетләрдән рәхмәт – иң зур бүләк

Әтәслеләрнең иң зур сөенече – алар үргән маскировка челтәрләренең фронттагы егетләребезгә барып җитүе. Яугирләребезнең рәхмәт сүзләре өлкәннәрне тагы да ныграк игелекле эшләр башкарырга рухландыра.

Әтәс авыл китапханәчесе Мәүҗидә Гарипова барлык игелекле эшләрдә катнашучы авыл халкына зур рәхмәтен белдерде.

Җирлегебез өлкәннәрен бары бер изге теләк берләштерә: тизрәк сугыш афәтләре бетсен, егетләребез исән-имин туган ягыбызга кайтсын, барыбызга да шатлыклы очрашулар насыйп булсын, – ди ул.

Рәхимәт сезгә, изге гамәлләр кылучыларыбыз! Сезнең теләкләргә без дә кушылабыз, якташларыбыз исән-имин кайтсыннар!