Иске Байсар авылы хоры «Җиңү җырын җырлый Актаныш» акциясендә ата-бабаларыбызның батырлыгын искә төшерде

Аларның җырларында якташларыбызның батырлыгы күз алдында җанланды: авылдан йөзләгән ир-ат Ватан азатлыгы өчен сугышка китә, ә авылда кплган халык, хатын-кызлар, кприлао, балалар фидакарьләрчә тылда хезмәт итә, Җиңүне якынайта.  

Эвакуацияләнгәннәрне кабул итү авыл тарихында аерым бер вакыйгага әйләнә. Авыр сугыш елларында Иске Байсар Эстониядән килгән гаиләләрне сыендырган. Алар арасында яшь кенә кыз-булачак танылган эстон язучысы Лилли Промет та булган. Соңрак үзенең «Ир-атсыз авыл" повестенда ул татар халкының киң күңеллелеген, тел киртәсенә карамастан, соңгы кисәк икмәкне бүлешергә әзерлеген җылылык белән тасвирлый. "Эстоннар татар телен , ә авыл халкы эстон телен белми иде, әмма фашизмны тар — мар итүгә гомуми омтылыш һәм ышаныч йөрәкләрне берләштерә иде", — дип билгеләп үтә Промет.

Иске Байсарда сугыш еллары истәлеген җырларда гына сакламыйлар. Музейда фотосурәтләр, фронттан килгән хатлар, авылның дистәләгән эвакуацияләнгән кешеләрне сыендыру турындагы тарихлар  тупланган. Ә Лилли Промет китабы инде озак еллар иң авыр заманнарда да үзара ярдәм һәм кешелеклелек символы булып кала.  

«Җиңү җырын җырлый Актаныш» акциясе сугыш тарихының дата — саннар гына түгел, ә бер максат өчен үрелгән миллионлаган кеше язмышы икәнлеген тагын бер кат исбат итте. Һәм без аларны хәтерлибез-геройлар үлми, алар мәңгегә исән.