«Гаилә» милли проекты кысаларында 33 яшь ана 50 мең сум күләмендә ярдәм алган

Соңгы 20 елда дәүләттән финанс ярдәм алучы Россиядәге балалы гаиләләр саны 10 тапкырга артты. Социаль ярдәм чараларын киңәйтү һәм яңа программалар кертү гаиләләрнең тормыш дәрәҗәсен күтәрүгә, бала табуны стимуллаштыруга һәм балаларны тәрбияләү өчен уңай шартлар тудыруга юнәлдерелгән.

«Гаилә» милли проекты кысаларында Актаныш районында аналарны һәм күп балалы гаиләләрне яклауга юнәлдерелгән комплекслы чаралар гамәлгә ашырыла. Даими рәвештә авыл җирендә яшәүче хатын-кызларга аерым игътибар бирелә. Алар өчен бала туу уңаеннан өстәмә түләүләр гамәлгә керде.

Мәсәлән, 25 яшькә кадәрге хатын-кызларга беренче бала туганда 50 мең сум күләмендә бер тапкыр бирелә торган түләү каралган. Моннан тыш, 29 яшькә кадәрге хатын-кызларга өченче һәм аннан соңгы балалар туганда 100 мең сум күләмендә түләү билгеләнә. Әлеге чаралар яшь гаиләләргә ярдәм итүгә, бала туу күрсәткечен арттыруга һәм районның авыл территорияләрендә демографик хәлен ныгытуны күздә тота.

2025 елда Актаныш районында 50 мең сум күләмендәге түләүне 33 кеше, ә 100 мең сум күләмендәге түләүне 8 кеше алган. Халыкка гамәлдәге социаль ярдәм чаралары турында мәгълүмат җиткерү эше дәвам итә, бу исә дәүләт ярдәм чараларыннан файдаланучы гаиләләр санын арттырырга мөмкинлек бирә.