Авылларда гына буладыр ул егетләрнең менә дигәне: «Актаныш-информ» подписчигы комбайнчыларны видеога төшергән

Актаныш районының авыл хуҗалыгы хезмәтчәннәре яңгырлар тыну белән бар көчне басу культураларын җыеп алуга юнәлтә. 21 август көненә урып-җыю эшләренең 22 проценты башкарылган. Район буенча уртача уңыш 22 центнер. Көзге бодайның гектар куәте 29, 8 центнер, арышныкы 22 центнер, борчак 24, 7 м, арпа 30, 1 центнер белән сөендерә. 

«Әнәк» агрофирмасы уңганнары инде язгы бодай басуларына да уракка төште. 38 гектар мәйданнан 1342 центнер икмәк җыеп алдылар, уртача уңыш 35, 3 центнерны тәшкил итә. 

 «Кырдагысы түгел, амбардагысы икмәк», дигәнне кечкенәдән ишетеп үскән халкыбыз иген басуларындагы вәзгыятькә битараф түгел. Айрат Шулбаев исемле подписчигыбыз "Алмазагротрейд" холдингы комбайнчыларының Иске Сәфәр авылы кырларында урып-җыю эшләрен башкаруын видеога төшереп безгә юллады. Җырның сүзләреннән аңлашылганча, дәү-дәү техникаларны иярләгән механизаторларны чын ир-егетләр дип саный ул. 

Авылларда гына буладыр ул,

Егетләрнең менә дигәне!

Алар гына белә бәхетләрнең

Туган якта гына икәнен!.

Эх, бар әле авылларда-

менә дигән зәһәр егетләр.

Ничек кенә тормыш сынаса да,

алар баш иярлек түгелләр!