Актаныш районы Корбан бәйрәменә әзер

— Быел Корбан бәйрәменә әзерлек ничек бара?

— Быелгы Корбан бәйрәменә без Актаныш районында бик җитди һәм оешкан төстә әзерләндек. Алдан ук планлаштырып, берничә киңәшмә үткәрдек. 24 мартта беренче җыелыш узды — анда сарык һәм эре мөгезле терлек асраучыларны чакырып, барлык таләпләрне аңлаттык. Ветеринария кагыйдәләре катгый үтәлә, шуңа күрә бу юнәлештә бернинди проблема булмас дип ышанабыз.

— Малларның әзерлеге ничек тикшерелә?

— Билгеле булганча, корбанлык малларның сәламәтлеге алдан тикшерелергә тиеш. Бер ай элек алардан кан анализлары алынды, барысы да контроль аша узды. Хәзерге вакытта маллар тулысынча әзер дип әйтә алабыз.

— Халык бу эшкә әзерме?

— Әйе, бүген дә берничә сарык асраучы белән сөйләштек. Алар барысы да әзерлекнең яхшы баруын әйтәләр, бу безне бик сөендерә. 

— Эре мөгезле терлек буенча хәлләр ничек?

— Бу юнәлештә дә эш бара. “Актаныш” агрофирмасы белән сөйләштек, алар корбанлык өчен терлек тәкъдим итәчәк. Шулай ук сугым процессы да тиешле дәрәҗәдә оештырылачак.

— Сугым пунктлары әзерме?

— Актаныш сугым пунктында хәзер актив әзерлек бара. Белгечләр барлык санитар һәм ветеринар таләпләрне үтәп эшлиләр. Егетләр бу эшкә җаваплы карый, Алла боерса корбан чалу процессы тәртипле һәм уңай шартларда узачак.

— Гомум нәтиҗә нинди?

— Быел без Корбан бәйрәмен лаеклы итеп каршы алырга әзер. Барлык шартлар да тудырылган, оештыру эше җайга салынган. Иң мөһиме — иминлек, тәртип һәм бердәмлек. Бәйрәмебез мөбарәк, бәрәкәтле булсын!