“Игътибар: балалар!“

20 августтан 10 сентябрьгә кадәр "Игътибар: балалар!" профилактик операциясе игълан ителде. 2012 елның 6 ае эчендә республикада балалар катнашында 271 юл фаҗигасе теркәлгән. Шуларда 9 баланың гомере өзелгән. Балалар гаебе белән ясалган юл-транспорт фаҗигаләренең төп сәбәпләре: җәяүлеләр өчен тиеш булмаган урында юлны аркылы чыгу; күрүне чикләүче предметлар аркасында җәяүленең көтелмәгәндә килеп чыгуы; олы юлда уйнау; балигъ булмаган балалар тарафыннан юл хәрәкәте кагыйдәләре бозылган башка төр очраклар (тиеш булмаган җирләрдә велосипед белән хәрәкәт итү). Мәктәпләрдә оешкан ЮИД отрядларының эшчәнлеген тиешенчә эшләтү балалар катнашында юл-транспорт һаләкәтләрен булдырмауның бер профилактик чарасы булып кала. Бу эш мәктәп, җәмәгатьчелек белән бердәм булып хәрәкәт иткән очракта гына нәтиҗәле була.