Юл хәрәкәте инспекторлары машина йөртүчеләргә кышкы резинага күчәргә киңәш итә

Татарстанда автомобиль йөртүчеләрне җәйге резиналарны кышкыга алыштыру турында алдан ук кайгыртырга чакыралар.

«Барыбыз да алда елның салкын вакыты көтелүен яхшы аңлауга карамастан, практика күрсәткәнчә, кызганычка, кыш һәрвакыт көтмәгәндә килә. Шул ук вакытта безнең кайбер автоһәвәскәрләр соңгы чиккә кадәр җәйге шиналар куелган килеш йөрүне дәвам итә», — диде «Татар-информ» мәгълүмат агентлыгында узган матбугат конференциясендә Татарстанның баш дәүләт автоинспекторы Ленар Габдрахманов.

Узган елның ноябрендә Татарстанда кинәт салкынайту нәтиҗәсендә өч көндә 580 авария булган, аларда тугыз кеше үлгән һәм тагын 40 кеше имгәнгән.

Республиканың баш дәүләт автоинспекторы сүзләренчә, техник регламент буенча, кышкы чорда шиплы резина куелмаган автомобильләрне файдалану тыелган.

«Юл-транспорт һәлакәтенә очрамау, гомерне һәм сәламәтлекне куркыныч астына куймау өчен, имин тизлек сайларга һәм кышкы шиналарга күчү турында алдан кайгыртырга киңәш итәбез», — диде спикер.

Чыганак: "Татар-информ"