"БАЛЫК - БУЛСЫН!": Актаныш районында да балыкларга ярдәм оештырылды (+ФОТОЛАР)

Су дәрәҗәсенең тирбәлеп торуы балыкларга уылдык чәчү өчен уңайлы урын эзләргә комачау итә.

Су биологик ресурсларын саклау, үрчетү максатыннан Татарстанда менә өченче ел инде “Балык – булсын!” акциясе нәтиҗәле оештырылып килә. Быел да ул Актаныш, Яшел Үзән, Кама Тамагы, Лаеш, Мамадыш, Минзәлә, Балык Бистәсе, Спасс, Тукай районнарында бердәм төстә старт алды. 

Татарстан Республикасының Биологик ресурслар буенча дәүләт комитетының Актаныш-Минзәлә районнары буенча ау күзәтчелеге бүлеге белән берлектә Актаныш район башкарма комитеты, район мәгариф идарәсе, урман хезмәткәрләре, “Нептун” балыкчылык  җәмгыяте, Татар Ямалы мәктәбе укучылары  әлеге акциягә 10 май көнне кушылды – бу көнне Ямалы күленә якынча  2,5 км. озынлыкта нарат ботаклары гирляндасы төшерелде. Шул рәвешле уылдык чәчү өчен суга ясалма урыннар булдырылды, мондый субстратта уылдыкларның сакланышы 85-90 процентка кадәр күтәрелә. 

- Түбән Кама сусаклагычында  су гел уйнап тора. Нәтиҗәдә, су биеклеге даими үзгәрә. Балыклар уылдык чәчкән чорда, бу фаҗигагә тиң – балыкларны саклап калу, үрчетү максатыннан без шушы уылдык салу өчен ясалма ояларны куябыз. Бәйләнгән, кирпеч белән ныгытылган нарат ботаклары, калкавыч кебек, бер урында тирбәлә. Авырлык куелгач, алар акмый – ике атнага бер тапкыр гирляндалардагы тереклекне тикшерәбез – ясалма ояларның файдасы бар, - ди Татарстан Республикасының Биологик ресурслар буенча дәүләт комитетының Актаныш-Минзәлә районнары буенча ау күзәтчелеге бүлеге җитәкчесе Ринат Шәйхетдинов.

Денис Хәсәнов җитәкләгән “Нептун” балыкчылык җәмгыяте хезмәткәрләре дә акциядә актив катнаша. Һәр бригада үз участогында шушы эшне башкара – Актаныш районы сулыкларында балыкларның сакланышы алар өчен дә бик әһәмиятле. 

Татар Ямалы мәктәбенең “Моряклар” хокук бозуларны кисәтү отрядына йөрүче укучылар да,  отряд җитәкчесе Зилә Нәгыймова белән берлектә, “Балык – булсын!” акциясен көтеп ала. Авыллары су буенда урнашкан балалар өчен бу гамәл ят түгел –  су ресурсларын сакларга кирәклекне дә алар яхшы белә. 

Акциядә катнашкан район башкарма комитеты җитәкчесе Илфак Бариев чараның тәрбияви максатын да азсызыклады. 

Чара ахырында акциядә катнашкан укучыларга кармаклар бүләк ителде. 

Сүз уңаеннан,  25 апрельдән 5 июньгә кадәр ау белән балык тотарга ярамый – балык уылдык чәчә. Ярдан бер кешегә ике кармак белән генә  тоту рөхсәт ителә. Бу нисбәттән полиция хезмәткәрләре дә, дәүләт ау күзәтчелеге инспекторлары да даими рейдлар оештыра.