Татарстанда тагын 30 кеше коронавирус инфекциясе йоктырган

Татарстанда соңгы тәүлектә Covid-19 коронавирус инфекциясе йоктыруның 30 яңа очрагы ачыкланган.

ТР Сәламәтлек саклау министрлыгының матбугат хезмәтеннән хәбәр итүләренчә, аларның бөтенесе дә чирне башка авырулар белән аралашу нәтиҗәсендә эләктергән.

«13 кеше хастаханәгә озатылган, 17 кеше өендә дәвалана», — диелә ведомство хәбәрендә.

Казанда — 10, Чаллыда — 7, Лениногорск районында — 4, Бөгелмә районында — 3, Тукай районында — 2, Азнакай, Буа, Биектау һәм Түбән Кама районнарында берәр очрак ачыкланган.

Пандемия башланганнан алып республикада коронавирус инфекциясенең 21 298 очрагы теркәлгән, 18 209 кеше (шуларның 28е — узган тәүлектә) терелгән.

Республикада барлыгы 329 701 кеше коронавируска каршы прививка ясаткан, 242 371 кеше икенче дозаны да алган.