Күрше республикада район даны лаеклы якланды

Район балалар һәм яшүсмерләр спорт мәктәбенең йөзү буенча тренеры Олег Ваганов:

— 30 ноябрьдә традицион рәвештә районнар арасында йөзү буенча ярышлар узды. Ярыш — Башкортстанның Югары Яркәй авылында булды. Ярышлар Башкортстан Республикасының спорт министрлыгының 100 еллыгына багышланды. Әлеге спорт чарасында 80 яшь йөзүче катнашты. Алар Илеш, ТР Актаныш һәм Мөслим төбәкләреннән килгән иде. Һәрбер катнашучы 1 дистанциядән старт алу хокугына ия булды һәм шулай район командалары арасында эстафета үтте. 

Безнең район командасыннан Румия Шәрипова, Кәрим Гарифҗанов — беренче тапкыр зурлар разрядын үтәгән, Виктория Кәррамова һәм Әнвәр Шәрипов матур җиңүләргә ирешкән. Шулай ук Рүзәл Гәйнетдинов — 2, Илъяр Шириев, Шамил Һадиев, Мансур Шәрипов һәм Камилә Кәррамова —3 призлы урыннарга чыгып, призёр буларак танылганнар. 

Турнирның кульминациясе — эстафеталы йөзүдә 8 йөзүче, 4 егет белән дүрт кыз катнашкан. Һәрбер спортчы 50 метрны йөзеп чыгарга тиеш булган. Һәм бик шатлыклы нәтиҗә: актанышлылар командасы җиңүчеләр булып калганнар. Команда составында Румия Шәрипова, Камилә һәм Виктория Кәррамовалар, Кәрим Гарифҗанов, Азалия Шәйморатова, Илъяр Шириев, Рүзәл Гәйнетдинов һәм Әнвәр Шәрипов.