«Башак» хуҗалыгында җитәкчеләрне көр савым сыерлары каршы алды

«Башак» хуҗалыгында җитәкчеләрне көр маллар каршылады. Кайбер хуҗалыкларда сазга батып пычранган, йоннары үрә баскан сыерлар очраса, «Башак» хуҗалыгының савым сыерларының тиресе шома, елкылдап матур булып тора.

Димәк, хуҗалык маллары витаминлы, сыйфатлы азык белән тәэмин ителгән, яхшы тәрбия, дөрес ашату сыерларның тышкы кыяфәтендә ачык чагыла. 

Хуҗалыкта терлекчелек тармагына зур игътибар бирелә. Быел савым сыерлары өчен яңа тораклар төзегәннәр, төзелеш киләчәктә моның белән генә тукталмаячак. Яшь бозаулар тәрбияләүгә җитди карыйлар.

Җитәкче Илүс Ярмиев 3 мең баш терлек асралуын әйтте. Нәфис Сәлимгәрәев хуҗалыкның потенциалы зур булуын, токымлы таналар кайтартып, терлек баш саннарын арттырырга тәкъдим итте.

Сөтнең күләмен 32 мең тоннага җиткерү бурычы куела, шулай эшләгәндә финанс-икътисади як тагы да яхшырачак, хезмәт хакын арттырырга мөмкинлек туа.  

Кышның соңарып килүе хуҗалыкларга файдага түгел, азыкны баздан алу, таратуда кыенлыклар бар. Хуҗалык нинди күләмдә сөт җитештереп кышка керә, шуның белән язга чыга. бу язылмаган закон. терлек баш саннарын саклау, савым сыерларын арттыру безнең төп бурыч, – диде Нәфис Әзһәм улы.