Афәрин: Быел Байсар мәктәбе укучылары юл йөрү кагыйдәләрен бер дә бозмаган

Шулай да белгәнне кабатлап тору, яңа кагыйдәләрне үзләштерү беркайчан да актуальлеген югалтмый. Бүген ЮХИДИның пропаганда бүлеге җитәкчесе Ләйсән Мөхәммәтова һәм ЮХИДИ инспекторы Гүзәл Хисамова көзге каникуллар алдыннан Иске Байсар мәктәбе укучылары белән очрашу уздырды. 

-Көзге каникуллар елның бик тә үзенчәлекле чорына туры килә. Көннәр кыскара, караңгы тиз төшә. Өстәвенә һава торышы еш үзгәреп торганга юлларда бозлавык хасил була. Юлларда куркыныч арта. Балаларның иминлеге, юлларда тәртипле йөрүләренә ирешү, аларга кагыйдәләрне даими аңлатып тору- өлкәннәрнең бурычы. Бүген без әнә шул максаттан профилактик әңгәмә үткәрдек, юл куркынычсызлыгына кагылышлы кагыйдәләр буенча чыгыш ясадык,- ди Ләйсән Рәдиф кызы.

Мәктәп укучылары кунаклар килүен әзерлек белән көтеп алганнар. Бозлавык юлда үз-үзеңне тоту кагыйдәләре һәм караңгыда яктылык кайтаргыч элементларны тагып йөрүнең кирәклеге турында видеролик төшергәннәр. Өйрәнгән шигырьләре, җырлары да  юл йөрү кагыйдәләренә багышланган иде.

Мәктәп укучыларыннан тыш әлеге чарада балалар бакчасы нәниләре дә катнашып тематик чыгышлар ясаганнар, һөнәрләрен күрсәткәннәр. 

Юл тәртибен пропагандалаучы хезмәткәрләр балаларның белемнәрен ни дәрәҗәдә үзләштерүен тикшереп караган. Ләйсән Рәдиф кызы белән Гүзәл Александровна төрле сораулар биргәч, укучылар югалып калмаган. 

Без һәр баланың мәктәпкә җәяүме, мәктәп автобусы беләнме килүен сорадык. Кайберәүләр әти-әнисенең машинасына утырып килгән. Шәхси әңгәмә барышында  нинди кагыйдәләрне үтәргә тиешлеге, бу кагыйдәләрне алар бүген үтәгәнме-юкмы икәнен сорадык. Укучылар бик төгәл һәм дөрес җавап бирделәр. Балаларның сәнгатьле һәм төзек җөмләләр белән аралашуларына игътибар иттек. Иске Байсар укучылары бу уңайдан яхшы яктан аерылып торалар. Балалар бакчасы нәниләре дә аларны игътибар белән тыңладылар. Укучылар кечкенәләргә матур үрнәк күрсәтте, -ди Ләйсән Мөхәммәтова.

Әлеге эчтәлекле, файдалы чараны Иске Байсар мәктәбе укытучысы, педагог-оештыручы Эльвира Мурзина оештырган. Эльвира Дәннур кызы мәктәпнең яшь юл хәрәкәте инспекторлары отрядын да җитәкли. Ләйсән Рәдиф кызы остазга балаларны юл иминлегенә өйрәтүдәге хезмәтләре өчен рәхмәтен белдерде, укучыларга яктылык кайтаргыч элементлар, белешмәлекләр бүләк итте.