«Ак чәчәкләр» конкурсының «Иң яхшы табиб»ы — Илдус Латыйпов

Әлеге мәртәбәле номинациядә бәйге җиңүчесенең исемен ачыклау өчен сәхнәгә мәртәбәле кунак — Яр Чаллы шәһәренең Ринат Сөләйман улы Акчурин исемендәге Ашыгыч медицина ярдәме хастаханәсе (БСМП) баш табибы Роман Адамбаевич Джумабаев чакырылды.

Роман Джумабаев: «Актаныш хастаханәсе республикада һәрвакыт үрнәк булып тора»

Роман Адамбаевич Актаныш районы медицина хезмәткәрләренә һәм биредәге хезмәттәшләренә үзенең җылы котлауларын һәм рәхмәт сүзләрен җиткерде:

«Актаныш районы бездән иң ерак урнашкан төбәк булса да, ул һәрвакыт йөрәгебезгә иң якын авылларның берсе. Биредә эшләүче кызларны аерым билгеләп үтәсем килә — күптән түгел узган спартакиадада алар искиткеч нәтиҗә күрсәттеләр. Гомуми берләшмә сыйфатында без Актаныш командасы ярдәмендә призлы өченче урынга күтәрелдек. Киләсе елда сезнең белән бергә беренче урын өчен барырбыз дип ышанам!

Без бердәм команда булып эшлибез. Бүген авыруларны безгә китерү һәм медицина ярдәме күрсәтү эше Актанышта югары дәрәҗәдә оештырылган, сезнең хастаханәгә карата бернинди дәгъва да юк. Район башлыгы Ленар Рафакович Актанышның башкаларга үрнәк булачагын әйткән иде — бу мизгел инде килде. Бүгенге көндә Актаныш хастаханәсе республиканың төньяк-көнчыгышында һәрвакыт „яшел зона“да булган бердәнбер медицина учреждениесе булып тора.

Барлык ветераннарга тирән рәхмәтемне белдерәм, яшьләргә уңышлар телим. Бәйрәм белән сезне!»

Балалар сәламәтлеге сагында — 20 ел хезмәт стажы

Бәйрәм котлауларыннан соң, Роман Адамбаевич җиңүче исеме язылган махсус конвертны ачты. Барлык таләпләргә җавап бирүче, нәни райондашларыбызның тормышын һәм сәламәтлеген саклауга зур өлеш керткән «Иң яхшы табиб» номинациясендә Актаныш үзәк хастаханәсенең табиб-педиатры Латыпов Илдус Феликс улы җиңеп чыкты.

 Балалар табибының тормыш һәм хезмәт юлы күпләргә үрнәк.

• Туган урыны һәм елы: Ул 1978 елда Актаныш районының Актаныш авылында дөньяга килә.

• Белеме: 2005 елда Башкортстан дәүләт медицина университетының «Педиатрия» факультетын тәмамлый. 2006 елда шушы ук уку йортында интернатураны уңышлы тәмамлап, югары квалификацияле белгеч дипломы ала.

• Һөнәри хезмәте: 2006 елдан алып бүгенге көнгәчә ул Актаныш үзәк хастаханәсендә табиб-педиатр булып хезмәт итә. Район балаларының сәламәтлеген кайгыртуга үзенең 20 ел гомерен багышлаган.

Үз һөнәренә тугрылыгы, нәни пациентларга карата булган җылы мөнәсәбәте һәм зур җаваплылыгы өчен Илдус Феликс улы райондашларыбыз арасында зур абруй казанды. Аны әлеге зур һәм лаеклы җиңүе белән чын күңелдән котлыйбыз!