Актанышта «Ак чәчәкләр» конкурсының «Иң яхшы шофер»ы ачыкланды: җиңүче — Тәлгать Халиков

Әлеге мәртәбәле номинациядә җиңүчене игълан итү һәм табибларның иң ышанычлы ярдәмчеләре булган машина йөртүчеләрне хөрмәтләү өчен сәхнәгә «ЧаллыТранс» транспорт компаниясе генераль директоры Рафак Мирзанур улы Шәрәфетдинов чакырылды.

Рафак Шәрәфетдинов: «Безнең тормыш сезнең кулда»

Рафак Мирзанур улы хастаханә җитәкчелегенә һәм барлык медицина хезмәткәрләренә мөрәҗәгать итеп, үзенең чын күңелдән чыккан бәйрәм котлауларын һәм рәхмәт сүзләрен җиткерде:

Уйлап карасак, Аллаһы Тәгаләдән кала, безнең тормышыбыз сезнең кулда бит. Бала ана карынында яралганнан башлап, тугыз ай дәвамында һәм алга таба да үсеп җиткәнче һәрвакыт сезнең күзәтү астында булабыз. Сезнең фидакарь хезмәтегез аркасында без шундый матур, уңган егетләр, кызлар булып үсәбез һәм үзебез дә әти-әниләр булабыз. Рәхмәт сезгә барлыгыгыз өчен!

Чыгышында «ЧаллыТранс» җитәкчесе Актаныш хастаханәсенең соңгы еллардагы уңышларын — яңа кабул итү корпусы ясалуын, заманча җиһазлар кайтуны һәм республика дәрәҗәсендә алдынгы урыннарда баруын югары бәяләде. Шулай ук үзенең туган авылы Күҗәкәдә хезмәт куючы фельдшер Зифа ханымга һәм 100 яшьлек юбилеен үткән Бөек Ватан сугышы һәм медицина ветераны Нәфига апага аерым рәхмәтләрен юллады.

«Кешеләргә эшләгән яхшылыгыгыз, күрсәткән шифагыз үзегезгә меңе белән кайтсын! Гаиләләрегез тигез, ныклы булсын», — дип сүзен тәмамлады кунагыбыз.

Югары дәрәҗәдәге һөнәри осталык

Күркәм котлау сүзләреннән соң, Рафак Мирзанур улы җиңүче исеме язылган махсус конвертны ачты. Барлык таләпләрне туры китереп, үз хезмәтендә аеруча сыналган һәм югары күрсәткечләргә ирешкән «Иң иң яхшы машина йөртүче» номинациясе җиңүчесе дип Актаныш үзәк хастаханәсе шоферы Халиков Тәлгать Газинур улы игълан ителде.

Тәлгать Газинур улын тамашачылар кайнар алкышлар белән сәхнә түренә озатты. Бәйге каһарманының тормыш юлы һәм эш эшчәнлеге үрнәк алырлык:

• Туган урыны: Ул 1988 елда Киров өлкәсе Кильмезь районы Тат-Бояр авылында дөньяга килә.

• Белеме: Киров өлкәсе Сәвәли авылындагы Политехник техникумын тәмамлый.

• Һөнәри юлы: Машина йөртү таныклыгын ул 18 яше тулу белән ала һәм хезмәт юлын шушы юнәлешкә багышлый. Бүгенгә көндә Тәлгать Газинур улының гомуми шоферлык стажы 19 елны тәшкил итә.

Тәлгать Халиков хастаханә транспортының өзлексез һәм куркынычсыз эшләвен тәэмин итүче, авыруларны һәм табибларны кирәкле урынга вакытында җиткерүче җаваплы хезмәткәр буларак танылган. Үз эшенә тугры булган Тәлгать Газинур улын мәртәбәле җиңүе белән чын күңелдән котлыйбыз!