Бүген Актаныш районының барлык мәктәпләрендә, балалар бакчаларында һәм башка мәгариф учреждениеләрендә террорчылыкка каршы өйрәнүләр узды. Иҗат төркемебез кадет-интернат мәктәбе һәм «Тылсым» балалар бакчасында оештырылган өйрәнүләр барышын күзәтте.
Актаныш районы Мәгариф идарәсе тарафыннан өйрәнүләрне әзерләү һәм үткәрү буенча тиешле боерык чыгарылган, оператив штаб составы расланган һәм чаралар планы төзелгән, -дип хәбәр итте мәгариф идарәсе белгече Айрат Кәрамов.
Өйрәнүләр барышында мәгариф учреждениеләрендә гадәттән тыш хәл килеп чыккан очракта хезмәткәрләрнең, сак хезмәтенең һәм ашыгыч хезмәтләрнең бердәм һәм дөрес эш итү алгоритмнары тикшерелде.
Өч төп шартлы ситуация каралды.
Беренче сценарий — бинаны басып алу һәм тотыкка алу. Шартлы рәвештә чит кешеләрнең- террористларның мәгариф учреждениесенә үтеп керүе, кешеләрне тотык итеп алуы күздә тотылды. Мондый очракта хезмәткәрләрнең һәм сакчыларның гамәлләре өйрәнелде. Алар тревога төймәсенә басып, ашыгыч хезмәтләргә хәбәр итәргә тиеш иде. Алга таба полиция хезмәткәрләре килеп, вазгыятьне контрольгә ала һәм заложникларны азат итү буенча тиешле чаралар күрә.
Икенче сценарий — бинага ут төртү. Өйрәнүләр вакытында шартлы рәвештә мәгариф учреждениесенә үтеп кергән кешенең янгын чыгарырга омтылуы күрсәтелде. Бу очракта хезмәткәрләрнең янгын сүндерү хезмәтенә һәм башка оператив хезмәтләргә тиз арада хәбәр итүе, кул астындагы янгын сүндерү чараларыннан файдаланып, утны сүндерергә омтылуы өйрәнелде. Шул ук вакытта кешеләрне имин урынга, запас чыгу юллары аша эвакуацияләү алгоритмы да тикшерелде.
Өченче сценарий — пилотсыз очкыч һөҗүме. Соңгы вакыттагы вакыйгаларны исәпкә алып, шартлы рәвештә пилотсыз очкычның мәгариф учреждениесе бинасына килеп бәрелүе яки аның янына шартлаткыч җайланма ташлануы каралды. Мондый очракта төп бурыч — кешеләрнең гомерен һәм сәламәтлеген саклау. Шуңа күрә хезмәткәрләрнең һәм укучыларның запас чыгу юллары аша тиз һәм оешкан төстә эвакуацияләнү тәртибе эшләнде.
Өйрәнүләрнең төп максаты — гадәттән тыш һәм террорчылык характерындагы вазгыятьләр вакытында мәгариф учреждениеләре хезмәткәрләренең әзерлеген тикшерү, аларның дөрес һәм оператив эш итү күнекмәләрен ныгыту, шулай ук ашыгыч хезмәтләр белән үзара хезмәттәшлекне камилләштерү.
Районда оештырылган өйрәнүләрнең аерым өлешендә янгын сүндерүчеләр, хокук саклау органнары хезмәткәрләре һәм ашыгыч медицина ярдәме вәкилләре дә катнашты. Калган мәгариф учреждениеләрендә өйрәнүләр расланган план нигезендә мөстәкыйль рәвештә үткәрелде.
Нет комментариев