Ир-егетләр иле өчен туа: Иске Кормаштан МХО ветераны Илсур Гыйзамов фронттагы улына автомобиль озатты

Махсус хәрби операция ветераны, Иске Кормаш авылында яшәүче Илсур Гыйзамов фронт сызыгында булган улы Фиданга чираттагы ярдәмне — махсус аның өчен әзерләнгән «Нива» автомобилен озатты. Бу — ата кешенең сугыш кырындагы улына һәм аның хезмәттәшләренә юллаган иң зур һәм кадерле бүләге.

Батырлык сыналган гаилә

Илсур үзе махсус хәрби операция хәрәкәтләрендә катнашып, анда алган авыр яраларыннан соң демобилизацияләнгән ветеран. Сугыш кырында күргән яралары аркасында аяклары сызлавына да карамастан, ул рухын төшерми: туган авылында матур итеп хуҗалык итә, йорт-җирен төзекләндерә. Иң мөһиме — үзе туган якка кайтса да, күңеле белән гел алгы сызыктагы егетләр янында. Ул фронттагы иптәшләренә төрле яклап даими ярдәм оештыра һәм авыл тормышында һәрвакыт югары активлык күрсәтә.

Гыйзамовлар гаиләсенең һәр улы — Ватан сакчысы:

• Улы Фидан контракт төзеп армиядә хезмәтен дәвам итә һәм МХО башланган беренче көннән үк алгы сызыкта илебез иминлеген саклый. Бүген әтисе җибәргән машина нәкъ менә аның хәрби хезмәтен җиңеләйтергә ярдәм итәчәк.

• 

• Узган ел хәрби хезмәткә алынган икенче улы Ибраһим да контракт төзегән һәм хәзерге вакытта махсус укулар үтә.

• Өченче улы Йосыф исә быел көзен армия сафларына басырга, Ватан алдындагы хәрби бурычын үтәргә җыена.

Районыбызда һәм Иске Кормаш авылында шундый олы йөрәкле, чын патриот гаилә булуы белән без чиксез горурланабыз һәм аларга тирән рәхмәтебезне җиткерәбез.

Бердәмлектә — көч!

Мондый зур эшләр һәрвакыт игелекле дуслар, якташлар ярдәме белән тормышка ашырыла. Илсур Гыйзамов «Нива» машинасын сатып алуда, аны техник яктан ремонтлап, фронтка озатырга (транспортировкалауга) зур өлеш керткән игелекле кешеләр — Азнакай «Татнефть-Энергосбыт» җитәкчесе Илдус Сәлаховка, әтиле-уллы Глүс һәм Гадел Исламовларга, шәхси эшмәкәр Ленар Әхмәтдиновка үзенең һәм гаиләсе исеменнән чиксез зур рәхмәтләрен җиткерә.

Бүгенге көндә бердәнбер теләгебез — сугышлар тизрәк бетсен, илләребез тынычлансын. Газиз егетләребезнең бөтенесе дә исән-сау, җиңү яулап туган якларына, үз өйләренә әйләнеп кайтуларын көтеп калабыз!