Үземнең ирем дә авыру булгангамы, ярдәмгә мохтаҗларга булышасым килә!

Фидәния Фирдәвис кызы Зәкиева «Игелек үзәге» халыкка комплекслы социаль хезмәт күрсәтү үзәгендә социаль хезмәткәр булып 4 кенә ел эшли. Кыска гына вакыт эчендә коллективта хөрмәт казанып өлгергән игелекле хезмәткәрләрнең берсе ул.

Һөнәри бәйрәме- Социаль хезмәткәрләр көне уңаеннан Фидәния Фирдәвис кызы Татарстан Республикасы халыкны эш белән тәэмин итү һәм социаль яклау министрлыгының рәхмәт хаты белән бүләкләнде. Күңел җылысын биреп инвалид авылдашларыбызны караучы, аларның иң якын кешесенә әверелгән мәрхәмәт иясе үзе дә тормыш тарафыннан сыналган. Фидәния менә 16 ел элек инсульт кичергән инвалид ирен тәрбияли. Сөйгәне урын өстендә калачак дисләләр дә, Фидәниянең тырышлыгы белән аякка баса, үзенә кирәк эшләрне мөстәкыйль рәвештә башкарырга, яңабаштан яшәргә өйрәнгән. Авыруларны карый белү, тәрбияләүнең үз нечкәлекләре.

Авыру кешене артык кызгану да кирәкми. Йомшак сөйләшү, аралашу белән беррәттән таләпчәнлек, көндәлек режимны саклау, вакытында даруларны, дәвалану чараларын кабул итү аякка бастыра.

Авыру кеше караганым булгач, эштә кыен булмады. Миңа 5 авыру беркетелгән, шуларның берсе урын өстендә генә ята. Өйләрен чиста-пөхтә тотам,  ашарга пешерәм,юындырам, киендерәм, кан басымнарын үлчим, даруларын, азык-төлек алып кайтып бирәм. Үземнең ирем дә авыру булгангамы, ярдәмгә мохтаҗларга булышасым, хәлләрен җиңеләйтәсем килә. Үз эшемне яратып башкарам, – ди Фидәния. 

Фидәния кебек тагын бик күп игелекле  һөнәр ияләре мактаулы бүләкләргә лаек булдылар.

Аларга әлеге хөрмәтне Актаныш районы башлыгы Ленар Зарипов,

 Татарстан Республикасы Хезмәт, халыкны эш белән тәэмин итү һәм социаль яклау министры урынбасары Юлия Абдреева, район башкарма комитеты җитәкчесенең социаль мәсьәләләр буенча урынбасары Дилбәр Әнвәрова күрсәтте, игелек ияләренең районыбыз, республикабызда социаль юнәлештә зур эшләр башкаруларына рәхмәт белдерделәр.