Сәхнәдә — халык талантлары: Актанышта драма коллективлары смотры дәвам итә

2026 ел Татарстанда Хәрби батырлык һәм хезмәт фидакарьлеге елы дип игълан ителде. Район смотры әлеге мөһим датага, шулай ук татар театры тарихындагы данлы юбилейларга багышлана:

• Якташыбыз, татарның беренче трагик актеры Мохтар Мутинның тууына — 140 ел;
• Татар әдәбияты классигы Фатих Әмирханның тууына — 140 ел;
• Галиәсгар Камал исемендәге Татар дәүләт академия театры нигезләнүгә — 120 ел.

Январь аеннан башланган әлеге мәдәни чара март аена кадәр дәвам итәчәк.

Конкурсның төп бурычы — авыл җирлегендә иҗади сәләтле кешеләрне ачыклау һәм халыкка күрсәтү. Театр сәнгате аша яшь буында ватанпәрвәрлек хисләре тәрбияләү, милли гореф-гадәтләребезгә хөрмәт уяту һәм татар драматургиясен таныту смотрның үзәгендә тора.

Сәхнә — тормыш көзгесе

Смотр шартлары буенча, һәр авыл клубы спектакль әзерләп, аны махсус график нигезендә тамашачыга һәм жюрига тәкъдим итә. Коллективлар репертуар сайлауда ирекле: сәхнәдә тарихи драмалар, психологик мелодрамалар, халык яраткан комедияләр дә урын алган. Аеруча уңышлы чыгыш ясаган коллективлар район мәдәният йортында узачак Театр атналыгында уйнау хокукын алачак.

Зал тулы тамашачы

23 февральдә Пучы мәдәният йорты каршында эшләп килүче халык театры Фәтхи Бурнашның үлемсез «Яшь йөрәкләр» әсәрен зур уңыш белән куйды. 20 март көнне Пучы артистлары Актанышның Әлфия Авзалова исемендәге район мәдәният сараенда уйнаячак.

Бүген, 27 февральдә, Әнәк мәдәният йорты үзешчән театры Разил Вәлиевнең «Әй, машина, машина, җитте минем башыма» спектаклен тамашачы хозурына тәкъдим итә.

Иртәгә, 28 февральдә, Богады халык театры Туфан Миңнуллинның «Йөрәк маем» спектаклен сәхнәләштерәчәк.

Авылларда театр утлары сүнми, сүрелми. Хөрмәтле тамашачылар! Сез дә спектакльләргә килегез, карагыз, үзешчән артистларыбызга алкышларыгызны бүләк итегез!

Фотоларда Пучы халык театры чыгышы