19 яшьлек кыз суга баткан

Татарстанның Теләче районында Максабаш авылы янында Макса күлендә 19 яшьлек кыз батып үлгән. 

Сулык су коену өчен җиһазландырылмаган булган, күл янында су коенудан тыя торган аншлаглар куелган.

Кыз компания белән яр буенда ял итә, йөзә белмәсә дә балалар өчен кабартыла торган түгәрәк йөзмә белән суга керә. Күрәсең, кызның кулындагы түгәрәк кулыннан ычкына һәм ул су астына төшеп китә. Аның гәүдәсен ярдан 3 метр эчтәрәк  балык тотучы күреп ала.