Татарстанлыларны мессенджерларда пәйда булган яңа мошенниклык схемасы турында кисәтәләр

Татарстан халкын мессенджерларда барлыкка килгән яңа мошенниклык схемасы турында кисәтәләр. Зыян салучылар үзләрен гражданнарның шәхси мәгълүматларын кулга төшерү өчен Дәүләт торак инспекциясе хезмәткәрләре итеп таныштыра.

Аферистлар Telegram яки WhatsApp мессенджерларында «ГЖИ» дип аталган махсус чатлар булдырып, күпкатлы йортларда яшәүчеләрне шунда өсти. «Мәгълүматны актуальләштерү» кирәк дигән сылтау белән, алар кешеләрне махсус ботка күчәргә чакыра һәм боттан килгән кодны гомуми чатка җибәрүләрен таләп итә. Кагыйдә буларак, бу — ике факторлы аутентификация коды, ягъни Дәүләт хезмәтләре порталындагы шәхси кабинетка яки онлайн-банкка керү өчен кирәкле раслану коды.

Җинаятьчеләр, кешеләргә басым ясау максатыннан, административ җаваплылык белән куркытуны да куллана.

Дәүләт торак инспекциясе искәртә:
Ведомствоның рәсми Telegram-каналы бары тик мәгълүмат бирү өчен генә хезмәт итә һәм «Жилинспекция Татарстана» дип атала. Инспекция хезмәткәрләре беркайчан да мессенджерлар аша шәхси мәгълүмат, раслану кодлары яки башка конфиденциаль мәгълүмат таләп итми.

Һәртөрле сораулар туса, гражданнарга ТР ГЖИның бары тик рәсми элемтә каналларына мөрәҗәгать итәргә киңәш ителә.

Белгечләр шулай ук Татарстан халкын шикле сылтамаларга күчмәскә, беркемгә дә шәхси мәгълүматларын һәм раслану кодларын тапшырмаска чакыра.