Аеш егете Радик Николаев армиядә вакытта Кара Диңгез өстеннән очып килүче егерме дронны бәреп төшергән

Актаныш районы Хәрби комиссариатында район җитәкчелеге белән очрашуда «Без Севастопольне сакладык, ел дәвамында егерме дронны бәреп төшердем», диде яңа гына солдат хезмәтеннән кайткан Радик Николаев. 

Радикны 2023 елның 17 октябрендә Казаннан 26 егет белән Хәрби диңгез флотына- Кара Диңгез флотына армия хезмәтен узарга озаталар. 

Севастопольгә килеп кенә урнашкан идек, безнең якка өч ракета җибәрделәр. Украина «Нептуннары» икән. Һава һөҗүменә каршы оборона (ПВО) аны бик тиз эләктерде. Шуннан кая эләккәнне аңлый башладык. Беренче айда куркытты инде. Төнге 1-дә «тревога»га уянасың, көндезге 12 сәгатькә кадәр сугышчан әзерлектә торасың. Башта шлем, гәүдәдә «броня», кулда автомат, хәрби припаслар,- ди беренче солдат көннәре турында  Радик. 

Украинаның кораллы көчләре гадәттә кичен штурм башлый. Бу вакытта күктәге пилотсыз очу аппаратларын күрүе шактый авыр. Хәрби вәзгыять «срочник»лар кулына да корал тоттыра. Нәкъ тә кичке эңгер-меңгердә яшь, үткен күзләр дроннарны аулый. Якташыбыз Радик Николаев та 1 ел эчендә автоматы белән 20 пилотсыз очкычны бәреп төшерә. Мондый югары нәтиҗәләргә ирешкән солдатларны, нигездә, хөрмәтләү көтә. Әмма ни сәбәпледер, Радикка кайтып киткәнче бүләген кулына алу насыйп булмый. 

Шуңа да карамастан, күңелен төшерми егет. Ватан алдындагы изге бурычын намус белән үти, югары класслылыкка имтиханнарны уңышлы тапшырып, өченче класслы хәрби дәрәҗәсенә ия була.

Армиядә бик күп дуслар таптым. Безнең ротада Красноярск, Киров өлкәсе һәм Татарстан егетләре күп иде. Татарлар 34 кеше идек. Бер-беребездән аерылу җиңел булмады. Хәрби хезмәт бик яхшы үтте дип уйлыйм. «Дедовщина» юк, һәр җирдә видеокүзәтү, туклану яхшы. Әни генә Кара Диңгез флотына эләккәч, нык борчылды. Махсус хәрби операция зонасына бик якын бит. Кайтуымны өйдәгеләр өзелеп көтеп алды. Аларның теләкләре чынга ашты, мин исән-сау, елмаеп, көлеп кайтып кердем. Барысы да бик шатландылар, – ди Радик.

Ләйсән Газизова фотолары