Актанышта «Татар егете, татар кызы – 2026» район бәйгесе уза

Бәйгедә Актаныш муниципаль районы мәктәпләре укучылары һәм балалар бакчаларында тәрбияләнүчеләр катнаша. Катнашучылар яшь категорияләре буенча бүленеп чыгыш ясый. 

Конкурс берничә этаптан тора. Беренче бирем – «Мин бит татар баласы...» темасына визит карточкасы. Анда катнашучылар үзләрен төрле иҗади алымнар аша тәкъдим итәләр. Икенче этапта егет-кызлар иҗади сәләтләрен күрсәтә: җырлыйлар, бииләр, шигырь сөйлиләр. «Һөнәрле үлмәс, һөнәрсез көн күрмәс» бәйгесендә конкурсантлар үз куллары белән ясаган эшләнмәләрен тәкъдим итә. Шулай ук «Гыйлем – кояш, акыл – канат» интеллектуаль этабында алар татар халкы тарихы, мәдәнияте, теле һәм гореф-гадәтләре буенча белемнәрен сыный.

Жюри әгъзалары катнашучыларның чыгышларын эчтәлек, оригинальлек, милли рухны чагылдыру, артистизм һәм сөйләм культурасы буенча бәяли.

Бәйге бик җанлы һәм мавыктыргыч рухта уза. Катнашучыларның һәр чыгышы тамашачылар тарафыннан җылы кабул ителә, алкышларга күмелә.

Йомгаклау нәтиҗәләре буенча җиңүчеләр билгеләнәчәк, алар дипломнар һәм истәлекле бүләкләр белән бүләкләнәчәк. Шулай ук барлык катнашучыларга сертификатлар тапшырылачак.