Алдагы көннәрдә җылыта: иминлек чараларын көчәйтү мөһим

Синоптиклар якын көннәрдә һава торышының сизелерлек җылытуын фаразлый. Бүген, 12 февральдә, һава температурасы −14 градус тәшкил итсә, 14 февральдә инде −4 градуска кадәр күтәреләчәк. 15 февральдә −2 градус, ә 17 февральгә, «Яндекс.Погода» сервисы мәгълүматлары буенча, температура 0 градуска кадәр җитәргә мөмкин.

Һава шартларының кискен үзгәрүе юллардагы вазгыятькә һәм инфраструктураның гомуми торышына йогынты ясый. Җылыткач, биналар түбәләрендәге кар массасы авырлыгы арта, боз һәм кар ишелеп төшү куркынычы көчәя.

Кичә узган юл хәрәкәте иминлеге комиссиясенең киңәйтелгән утырышында район Башкарма комитеты җитәкчесе, комиссия рәисе Илфак Бариев җитәкчеләргә түбәләрне вакытында кардан чистартырга кушты. Җепшек көннәр башлану белән кар авырая һәм кеше гомеренә, сәламәтлегенә җитди хәвеф тудыра.

Бәхетсезлек очракларына юл куймас өчен җаваплы хезмәтләр түбәләрне чистарту эшләрен билгеләнгән срокларда оештырырга һәм башкарырга тиеш. Иминлек — барыбызның да уртак җаваплылыкта.

Юл хәрәкәте иминлеге комиссиясе утырышында шулай ук барлык машина йөртүчеләргә  мөрәҗәгать яңгырады. Бигрәк тә мәктәп автобуслары йөртүчеләренә җаваплылык зур. Мәгариф учреждениеләре директорларына йөртүчеләргә юл хәрәкәте кагыйдәләрен төгәл үтәү кирәклеген даими искәртеп тору тәкъдим ителде. Аларны юлларда аеруча игътибарлы һәм сак булырга өндәү кирәк.

Тизлек режимын үтәгез, дистанция саклагыз, кискен маневрлардан тыелыгыз. Һава шартлары үзгәргән чорда һәр карар аеруча әһәмиятле.

Юлдагы иминлек — һәркайсыбызның җаваплылыгы!