«Макс» мессенджерындагы «Цифрлы ID» сервисы Татарстанда өлкән буын арасында да популярлык казана: хәзерге вакытта аны инде 53 меңгә якын кеше рәсмиләштергән.
2026 елның июне белән чагыштырганда, электрон профиль булдырган өлкәннәр саны ике тапкыр арткан. Шулай ук 20 меңнән артык күп балалы гаилә Цифрлы ID рәсмиләштергән. Бу хакта ТР Дәүләт идарәсен цифрлы нигездә үстерү, мәгълүмати технологияләр һәм элемтә министрлыгы матбугат хезмәте хәбәр итә.
Сервис кәгазь документларны (паспорт, СНИЛС, мәҗбүри медицина иминияте полисы, ИНН, машина йөртү таныклыгы, күп балалы гаилә таныклыгы, студент билеты, пенсионер таныклыгы) алыштырырга мөмкинлек бирә. Аның ярдәмендә шәхесне, яшьне яки ташламаларга хокукны тиз генә расларга мөмкин, бары смартфонда QR-кодны күрсәтергә генә кирәк.
Хәзер Цифрлы ID системасы Татарстанның 213 мәдәният учреждениесендә эшли. Бу мәдәни оешмаларга килүчеләрне үзләре белән кәгазь документлар йөртүдән азат итә.
Моннан тыш, сервиска республиканың 161 кунакханәсе тоташтырылган. Кунакларга озын юлдан соң паспорт яки бала туу турында таныклык эзләргә, ә администраторларга шәхси мәгълүматларны кулдан компьютерга күчерергә кирәкми. Теркәлүне рәсмиләштерү берничә секундта QR-код ярдәмендә уза, бу туристлык сезонының иң кызу чагында аеруча уңайлы.
Цифрлы ID ны ничек теркәргә:
1. «Макс» мессенджерын йөкләп алыгыз һәм экран астында урнашкан «Цифрлы ID» бүлегенә күчегез.
2. «QR булдырырга», ә аннары «Документлар өстәргә» төймәләренә басыгыз.
3. Мәгълүматларның иминлеге өчен биометрия буенча керү функциясен кабызыгыз.
4. Шәхесегезне раслау өчен «Дәүләт хезмәтләре» порталы аша авторизация узыгыз.
Цифрлы ID ны куллану бик гади: мессенджерны ачып, оешма хезмәткәренә яки кассада QR-кодны күрсәтү дә җитә. Код һәр 30 секунд саен яңартыла һәм хуҗаның җайланмасында гына эшли, бу башкаларның чит документларга керүен булдырмый.
«Макс» мессенджерында уңайлы сервисларны үстерү «Мәгълүматлар икътисады» илкүләм проектының төп бурычларына җавап бирә. Аның төп максаты — халык өчен аңлаешлы һәм уңайлы цифрлы сервислар булдыру.
Чыганак: https://tatar-inform.tatar/news/tatarstanda-maks-messendzerynda-cifrly-id-rasmilastergan-pensionerlar-ike-tapkyr-artkan-5930279
Нет комментариев