Затлы мотоцикл түгел, бала гомере кыйммәт!
Язгы матур көннәр үзенекен итә, бигрәк тә яшь-җилкенчәкләрнең йөрәге чабышкы тайныкы кебек тибә башлый. Кыш буе гаражда тик яткан матай, питбайклар күзне кыздыра, кабызып та карыйлар. Көндез юлга чыгарга кыймасалар да, егетләр төнлә белән Актаныш урамнарыннан мотоциклларда җилдерә, бөтен тирә-як узыш шау-шуына күмелә. Бигрәк тә 57 нче бистәдә яшәүчеләр йокларга җыенганда гына әлеге гөжләүгә сискәнеп китә.
Узган җәйләрнең статистикасы коточкыч – бөтен ил буйлап квадроцикллар, мотоцикллар, питбайклар белән идарә иткән балалар үлеме, гомерлеккә имгәнүләре чыннан да чаң кагарлык. Мондый транспорт чараларын балаларга бары тик өлкәннәр: я әти-әниләре, я башка туганнары һәм танышлары сатып алып бирә. Нигездә, кыйммәтле бүләк, әлбәттә, ата-аналарныкы. Кыйммәтле уенчык сатып алып биреп, баланы бәхетле балачак белән тәэмин итәм, дип уйлый, баласын куандырырга тели алар. Әмма еш кына баласына үлемгә китерә торган уенчык тоттыруын аңламыйлар.
Күптән түгел, Татарстан Прокуратурасы һәм Дәүләт автоинспекциясе ата-аналарга балаларына питбайклар сатып алмау буенча мөрәҗәгать итте.
Россия Федерациясе Юл хәрәкәте кагыйдәләренең 24.1 маддәсе нигезендә 14 яшьтән яшьрәк затларга велосипед белән юлларда хәрәкәт итү тыела, ә мопед белән идарә итү 16 яшьтән яшьрәк булмаган затларга гына рөхсәт ителә.
Моннан тыш, балигъ булмаган йөртүче тоткарланган очракта, ата-аналар (законлы вәкилләр) балигъ булмаганнарны карау һәм тәрбияләү бурычларын үтәмәгән өчен административ җаваплылыкка (РФ КоАПның 5.35 маддәсе 1 өлеше) тартылачак, ә балалар үзләре профилактик исәпкә куелачак.
Мопедлар, скутерлар һәм мотоцикллар белән идарә итүне тиешле законлы хокук һәм машина йөртү күнекмәләреннән башка тыярга. Ата-аналар контроле – балалар куркынычсызлыгының нигезе!
Следите за самым важным и интересным в Telegram-каналеТатмедиа
Нет комментариев