11 сентябрь — Бөтенроссия аеклык көне

Аеклык — сәламәтлек һәм тулы тормыш нигезе

Аек тормыш рәвеше кешенең сәламәтлегенә генә түгел, көндәлек тормышына да уңай йогынты ясый. Аеклык — фикерләрнең ачыклыгы, сыйфатлы йокы, энергия, гаиләдә җылы мөнәсәбәтләр һәм вакытны файдалы үткәрү мөмкинлеге.

Алкоголь организмга ничек тәэсир итә?

Алкоголь 200дән артык төрле авыру һәм патологик халәт белән бәйле. Аны озак вакыт һәм даими куллану бавыр циррозы, йөрәк-кан тамырлары авырулары, панкреатит, яман шешләр һәм психик тайпылышлар барлыкка килү куркынычын арттыра.

Спиртлы эчемлекләрдән баш тарту организмга уңай үзгәрешләр китерергә мөмкин. Бер ай дәвамында алкоголь кулланмау кан басымын нормальләштерергә, йокыны яхшыртырга, бавырга булган йөкләнешне киметергә ярдәм итә.

Аеклыкны сайлау — үзеңне чикләү генә түгел. Бу үз сәламәтлегеңә, гаиләңә һәм киләчәгеңә җаваплы караш.

Буш вакытны файдалы үткәрү

Алкогольдән баш тарткан кешеләр еш кына буш вакытларының күбәюен, йокы һәм кәефләре яхшыруын, энергияләре артуын билгеләп үтә.

Буш вакытны спорт белән шөгыльләнүгә, саф һавада йөрүгә, китап укуга, иҗатка, гаилә белән аралашуга яки башка мавыгуларга багышларга мөмкин. Аек тормыш рәвешенә гадәтләрне балачактан формалаштыру аеруча мөһим.

Ярдәм сораудан курыкмагыз

Алкогольгә бәйлелек — кешенең ихтыярсызлыгы яки характеры көчсезлеге генә түгел, ә белгеч ярдәме һәм дәвалану таләп итүче җитди хроник авыру.

Әгәр үзегездә яки якын кешегездә алкоголь белән бәйле проблема бар икән, медицина белгечләренә мөрәҗәгать итәргә кирәк. Актаныш үзәк район хастаханәсендә табиб-нарколог кабул итә.

Белгечкә язылу өчен хастаханә регистратурасына мөрәҗәгать итәргә мөмкин.

«Актаныш үзәк район хастаханәсе» регистратурасы телефоны: +7 (85552) 3-42-10

Ярдәм сорау — көчсезлек билгесе түгел. Бу — үз сәламәтлегеңә һәм якыннарыңа карата җаваплы адым.

Аеклык — сәламәтлеккә, гаилә иминлегенә һәм тулы тормышка юл.