Такталачыкта мәктәп яны зиратын чистарттылар

Такталачык авылының мәктәп ягы зиратында чистарту, куркыныч тудырып торган агачларны кисү һәм куакларны төпләп түгү эшләре башкарылды.

 Шулай ук каберлекләр аралары чистартылды, агач курпылары чабылды.

- Бу эшләрне башкаруга ярдәмнәрен керткән абый-апаларыбызга, өмәне оештыруда башлап йөрүче- зиратыбызны тәртипләп карап торучыларыбыз Риф абый Мингазов, Фоат абый Нуриевларга, шәхси тракторы белән һәрдаим булышучы Надил Шәеховка, «Таң» хуҗалыгы механизаторы Эльвир Сәрвәретдиновка, зур агачларны аеруча осталык белән кисүче Хәлим Әкрамов, Рузалин Мингазов, Айзат Нуриевларга, саваплы һәм игелекле эштә үз көчләрен кертүчеләребезне аерып тормыйча, барлык авылдашларыбызга һәм ярдәмгә кайтучыларыбызга зур рәхмәтләребезне җиткерәбез!-дип хәбәр юллады безгә Такталачык авыл җирлеге башлыгы Марс Мансуров.