Туган якны өйрәнү музеенда Айрат Сәрвәровның “Гүзәл туган җирем” күргәзмәсе ачылды

“Гүзәл туган җирем” – йөрәктә туган иҗат

«Гүзәл туган җирем” дип исемләнгән рәсем күргәзмәсе  — җирлегебезнең танылган укытучы-рәссамы, Татарстан Республикасының атказанган мәдәният хезмәткәре Сәрвәров Айрат Изил улының шәхси иҗат дөньясын чагылдырган әһәмиятле мәдәни вакыйга.

Күргәзмә автор өчен аеруча истәлекле: ул аны үзенең 50 яшьлек юбилее белән бәйләп оештырган. Бу — еллар буе тупланган тәҗрибәнең, иҗади эзләнүләрнең һәм күңел җылысын тамашачыга җиткерүнең бер чагылышы.

Айрат Изил улы — күп еллар дәвамында балаларга сәнгать серләрен өйрәтүче остаз. Аның иҗаты укытучылык эшчәнлеге белән тыгыз үрелгән. “Балалар белән эшләү — үзе бер иҗат,” — ди ул. Шул ук вакытта рәссам үзенең шәхси иҗатына да зур игътибар бирә, актив рәвештә төрле жанрларда әсәрләр иҗат итә.

Күргәзмәдә барлыгы 27 эш тәкъдим ителә. Алар арасында пейзажлар, портретлар һәм туган як тормышын чагылдырган композицияләр бар. Соңгы елларда авторның иң яраткан юнәлеше — табигать күренешләре. “Гүзәл туган җирем” дип аталуы да юкка түгел: рәссам үзенең әсәрләрендә Актаныш төбәгенең кабатланмас табигатен, аның матурлыгын һәм рухи байлыгын тасвирлый.

Әлеге күргәзмә — 2011 елда узган беренче шәхси күргәзмәнең дәвамы. Еллар узу белән рәссамның карашы да, осталыгы да үзгәргән, камилләшкән. “Бу еллар — иҗади яктан үсеш чоры булды,” — ди автор. Чыннан да, бүгенге эшләрендә тирәнлек, тәҗрибә һәм профессиональлек ачык сизелә.

Рәсемнәр төрле техникаларда башкарылган: майлы буяулар, акварель, пастель, гади һәм төсле карандашлар кулланылган, берничәсе катнаш техника белән ясалган. Бу исә авторның киң мөмкинлекләрен һәм иҗади эзләнүләрен күрсәтә.

Күргәзмә ачылышына рәссамның якыннары, хезмәттәшләре, укытучылары һәм дуслары җыелды. Алар — авторның иҗатына илһам бирүче, аны һәрвакыт хуплап торучы кешеләр.

Айрат Изил улы үзе өчен иң кадерле әсәрләрнең берсе итеп “Әнием” портретын атый. Әлеге картинада тирән мәхәббәт, ихтирам һәм җылылык чагыла. Бу әсәр тамашачылар күңелендә дә аеруча көчле тәэсир калдыра.

Укытучылык хезмәте

Рәссам инде 28 ел дәвамында балаларга белем бирә, сәнгать мәктәбендә хезмәт куя. “Үз эшеңне яратырга кирәк,” — ди ул. Чыннан да, аның иҗаты — хезмәткә тугрылыкның, туган якка мәхәббәтнең һәм сәнгатькә бирелгәнлекнең ачык мисалы.

Балалар сәнгать мәктәбендә Айрат Сәрвәров җитәкчелегендә 50гә якын бала рәсем сәнгате белән шөгыльләнә. Остаз өчен бу — зур горурлык та, җаваплылык та. Ул балаларга бары тик рәсем ясау серләрен генә түгел, ә иҗатка мәхәббәт, тырышлык һәм сабырлык тәрбияли.

Аның укучылары белән берлектә төрле күргәзмәләр даими рәвештә оештырыла. Алар Туган якны өйрәнү музее белән тыгыз хезмәттәшлектә үтә: төрле темаларга багышланган экспозицияләр, иҗади проектлар, конкурслар — болар барысы да яшь рәссамнар өчен зур тәҗрибә мәйданы булып тора.

Айрат Изил улының укучылары арасында бүгенге көндә төрле өлкәләрдә уңышка ирешкәннәр шактый. Кайберләре инде сәнгать юлын сайлап, һөнәри белем алып эшли, кайберләре әле укуын дәвам итә. Аеруча сөендергәне — алар арасында чит илләрдә иҗат итүчеләр дә бар. Мәсәлән, Кореядә эшләүче укучылары, шулай ук халыкара проектларда, шул исәптән мультфильмнар эшләүдә катнашучылар да бар.

Мәскәү шәһәрендә дизайнер һөнәрен үзләштергән, иҗат өлкәсендә үз урыннарын тапкан шәкертләре дә остаз өчен зур горурлык. Алар турында килгән уңай фикерләр, ата-аналарның рәхмәт сүзләре — укытучының хезмәтенә иң зур бәя.

“Балаларга бер генә теләгем бар: тырыш булсыннар, үз максатларына омтылсыннар. Тырышкан кеше һәрвакыт уңышка ирешә,” — ди Айрат Сәрвәров.

Чыннан да, остазның күпьеллык хезмәте һәм фидакарьлеге нәтиҗәсендә үсеп чыккан буын — бүгенге сәнгать дөньясының лаеклы дәвамчылары.

Иҗатыгыз өчен рәхмәт!

Актаныш районы башкарма комитетының социаль һәм агарту бүлеге башлыгы Наилә Исламова Айрат Изил улы Сәрвәровны ихлас күңелдән тәбрик итте:

— Айрат Изил улы, сезне шушы күркәм юбилеегыз белән чын күңелдән котлыйбыз. Сезгә ныклы сәламәтлек, иҗади уңышлар, илһам чишмәләренең саекмавын телибез. Сез үзегезнең матур иҗатыгыз белән халкыбызны, районыбызны сөендерәсез, күңелләргә яктылык өләшәсез. Алга таба да шушы югары дәрәҗәне саклап, укучыларыгызга сәнгать серләрен өйрәтеп, үзегез кебек сәләтле рәссамнар тәрбияләүне дәвам итүегезне телибез.

Сезнең иҗатыгыз — рухи азык, күңел байлыгы чыганагы. Гаиләгез белән иминлектә, балалар шатлыгында, якыннарыгызның ихтирамын тоеп, озын-озак еллар безне шундый күркәм әсәрләрегез белән сөендереп яшәргә язсын. Шушы матур күргәзмә өчен зур рәхмәтебезне җиткерәбез.

Сәнгать мәктәбе директоры Айзат Әмиров та Айрат Сәрвәровның хезмәтен югары бәяләде:

— Айрат Изил улы — безнең Сәнгать мәктәбенең иң тәҗрибәле, иң уңган укытучыларының берсе. Ул сәнгать бүлеген җитәкли һәм күп еллар дәвамында үзен чын остаз, үз эшенең чын белгече итеп танытты. Район күләмендә нинди генә чара узмасын, күргәзмәләр оештыруда ул безнең иң зур ярдәмчебез.

Аның җитәкчелегендә укучылар да, укытучылар да матур, эчтәлекле күргәзмәләр тәкъдим итәләр. Ә бүген без аның шәхси иҗатын күрү бәхетенә ирештек. Ул — оста рәссам гына түгел, ә балалар белән уртак тел таба белгән, аларны иҗатка рухландыручы укытучы да.

Айрат Изил улы, сезгә киләчәктә дә шушы юнәлештән тайпылмыйча, иҗади уңышлар белән безне сөендереп яшәргә насыйп булсын. Сәламәтлек, яңадан-яңа казанышлар телибез.

Сәнгать мәктәбе укытучысы Сәвия Таһирова остазлык һәм иҗатчының бер йөздә булуына соклануын белдерде:

— Айрат Изил улы Сәнгать мәктәбенә 1998 елда кайтып эшли башлады һәм нәкъ менә аның тырышлыгы белән рәсем сәнгате бүлеге үсеш алды. Инде 28 ел дәвамында ул балалар мәхәббәтен яулап, ата-аналарның һәм хезмәттәшләренең ихтирамын казанып, нәтиҗәле эшләп килә.

Ул — табигатьтән бирелгән сәләтле рәссам гына түгел, ә чын педагог та. Чөнки сәнгатьтә сәләтле булу гына җитми, ә белемеңне башкаларга да тапшыра белү мөһим. Айрат Изил улы укучыларына ныклы нигез бирә, аларны һөнәри юнәлешкә әзерли, югары уку йортларына керүләренә юл ача.

Бүген без аның иҗаты аша гаилә җылысын, әнисенә булган мәхәббәтен, туган якка тугрылыгын да күрәбез. Бу — чын сәнгать кешесенең йөрәгеннән чыккан ихлас иҗат.

Айрат Изил улы — остаз да, иҗатчы да, илһам бирүче шәхес тә. Аның хезмәте — районыбызның мәдәни тормышында әһәмиятле урын алып тора.

“Гүзәл туган җирем” күргәзмәсе — ул табигатькә, туган төбәккә, кешегә булган ихлас мәхәббәтне чагылдырган рухи байлык чыганагы. Мондый чаралар халкыбызның мәдәни тормышын баета, милли сәнгатькә игътибарны арттыра.