Татарстанда беренче тапкыр «Катык» Этнография фестивале булачак. Әлеге фестиваль татар халкының үзенчәлекле мәдәниятен һәм гореф-гадәтләрен күрсәтү максатыннан уздырыла.
«Якын күршеләребезне – Чувашия һәм Марий Эл Республикасы вәкилләрен дә чакырырга телибез. Алар да фестивальдә милли ризыкларын, сувенир эшләнмәләрен күрсәтәчәк. Фестивальнең төп вакыйгасы – зур казанга салынган катыкны тәкъдим итү һәм аны борынгы рецепт буенча әзерләү турында сөйләү. Бу сөт ризыгын фестивальгә килгән һәр кеше дә татып карый алачак», – дип сөйләде музей директоры Миңнедамир Камалетдинов.
Шулай ук фестивальдә фольклор ансамбльләр дә чыгыш ясаячак. Музей территориясендә фестиваль кунаклары милли киемнәр киеп карый һәм халык һөнәрчелеге буенча төрле мастер-классларда катнаша алачак.
Миңнедамир Камалетдинов сүзләренчә, ширдан катыгын Александр Пушкин да ашап караган дигән мәгълүматлар бар.
Фестивальне уздыру 2022 елның август башына планлаштырылган.
Нет комментариев