Актаныш муниципаль район башлыгы Ленар Зарипов районыбызның авыл хуҗалыгы хезмәтчәннәрен бәйрәм белән котлый

Хөрмәтле авыл хуҗалыгы һәм эшкәртү сәнәгате хезмәткәрләре!

Сезне һөнәри бәйрәмегез белән ихлас күңелдән тәбрик итәм. Авыл тормышына чын күңелдән гашыйк булган җир кешесе өчен иң зур, иң күркәм һәм әһәмиятле бәйрәмнәрнең берсе ул. 

Агымдагы ел безнең өчен бик уңай килде.Эш сөючәнлек һәм ныклык үрнәге булган игенчеләребез үз хезмәтләренә тугры калып яхшы уңыш җыеп алуга ирештеләр. Төп керем чыганагы булган терлекчелек тармагында да алдагы ел иминлегенә яхшы нигез салынды.
Кыенлыклар белән исәпләшмичә, үз эшен намус белән башкарган тәҗрибәле игенчеләребез, механизаторларыбыз, терлекчеләребез, гомумән, күпкырлы авыл хуҗалыгының фидакарь хезмәтчәннәре белән чын мәгънәсендә горурланабыз. Кадерле авыл хуҗалыгы һәм эшкәртү сәнәгате хезмәткәрләре! Тырыш хезмәтегез өчен олы рәхмәтемне җиткерәм. Сезгә нык сәламәтлек, гаиләләрегезгә иминлек, куанычлы тормыш, күтәренке рух һәм яңа хезмәт җиңүләре телим. Дөньяларыбыз имин, күкләребез аяз булсын! Бәйрәм белән!

Ихтирам белән, Актаныш муниципаль район башлыгы Л.Р. Зарипов