Ватанны саклаучы дигән һөнәр бар!

           "Бүген районыбыз кешеләре күңелләренә хуш килгән, үзләренә ошаган эш табарлар дигән ышанычта без", ди  Бөтенроссия "Бердәм Россия" сәяси партиясенең Актаныш җирле бүлекчәсенең  башкарма сәркатибе Зәһинә Исламова. 

                  14-15 апрель көннәрендә узган муниципаль дәрәҗәдәге "Россиядә эш"- "Работа в России" эшкә урнаштыру ярминкәсенә районның оешма-предприятие вәкилләре дә катнашты. Район хәрби комиссариаты, "Стриж" җәмгыяте җитәкчеләре ярминкәгә килгән райондашларыбыз белән аралашты, сораштыру үткәреп, вакансияләр тәкъдим итте.

              "Стриж" җәмгыяте башкарма директоры Зәйфәрия Нургалиева "Акчарлак" кафесына алмаш пешекчеләр кирәклеген әйтте. Пешекченең эш сәгате 7.00 сәгатьтән 21.00 сәгатькә кадәр, якшәмбе- ял көне, көн аралаш эшлиләр. "Тургай" кафесы җыештыручыларга, барменнарга, технологларга кытлык кичерә. "Эшне башкару осталыгы, җаваплылыкка карап хезмәт хакларын күтәрәбез", ди Зәйфәрия Нургалиева. 

             Ике кулына бер эш эшләп өйрәнгәннәргә эшсез калудан да авыры юк. Зөбәер авылында кибетче булып хезмәт куйган Миләүшә Җәмилева "Россиядә эш"- "Работа в Росии" эшкә урнаштыру ярминкәсенә халыкны эш белән тәэмин итү үзәге чакыруы буенча килгән. Кибет ябылгач, ул эшсез кала. 

- Миңа 57 яшь тула. Авылда 83 яшьлек әтием белән яшим. Аны калдырып авылдан китә алмыйм, ә авылда миңа яраклы эш юк, - ди ярминкәгә эш табарына өметләнеп килгән Миләүшә апа. 

             Бүген Актаныш районының эш белән тәэмин итү үзәгендә 103 вакансия бар. Ихтыяҗның 80 проценты югары белемле белгечләргә туры килә. Бигрәк тә районыбызга табиблар, ветеринария табиблары, инженер-механиклар җитми.

- 18 яшьтән 65 яшькәчә булган ир-егетләр, 18- 60 яшьлек хатын-кызларны эшкә урнаштырабыз. Белгечләрне районыбызга тарту, эшсезләрне эш белән тәэмин итүдә район хакимияте белән берлектә кулга-кул тотынып эшне оештырабыз. Оешмалар безгә үзләренә кирәкле белгечләр турындагы мәгълүматны китерә. Эшләп торган кеше дә әгәр үзенә һөнәре ошамаса, "Работа в России" порталында эш эзләүче категориясенә теркәлеп гариза яза. Без аларны порталдан күреп эш эзли башлыйбыз. Әгәр кеше үзенең резюмесын урнаштыра икән, аны Россиянең төрле регионнарында күрәләр. Райондашларыбызга башка төбәкләрдән эшчеләр эзләүчеләр турында да җиткерәбез, - ди район Халыкны эш белән тәэмин итү үзәге җитәкчесе Назиф Салихов.

Бүгенге ярминкәдә Актаныш районы хәрби комиссары Ленар Әхмәтҗанов та катнашты. Ленар Сәмигулла улы махсус хәрби операциягә китүчеләргә күрсәтелә торган дәүләт ярдәмнәре, хезмәт хаклары белән таныштырды. 

— Хәрби контрактны 20 яшьтән 40 яшькәчә хатын-кызлар, 18 яшьтән 65 яшькәчә ир-егетләр белән төзибез. Армиядә хезмәт итү мәҗбүри шарт түгел. Вакансияләр ярминкәсендә, шулай ук военкоматның үзендә дә контракт төзүчеләрне кабул итәбез,- диде хәрби комиссар.

 

Ватанны саклаучы дигән һөнәр бар

Ике райондашыбыз хәрби комиссариат җитәкчелеге белән турыдан-туры аралашып, махсус хәрби операциягә барырга теләк белдерделәр. Шунда ук гариза яздылар, кирәкле документларын тапгырдылар. Кыю карар кабул иткән райондашларыбызының  фикерләре белән кызыксынгач, алар исемнәрен язмауны сорады. Фәкать илебезне, туган җиребезне неонацизм тарафдарларыннан яклау һәм саклауны үзләренең ир-егетлек бурычы дип санауларын әйттеләр.

Махсус хәрби операциядә катнашырга теләп контракт төзүчеләргә бер тапкыр 195 мең сум акча түләнә. Украина ягына кереп киткән очракта шәхси исәп счетына ай саен 204 мең сум күчерелә. Бигрәк тә танкистлар, стрелоклар, радистлар, элемтәчеләр һәм медицина хезмәткәрләре кирәк. Соңгы белгечлекләр буенча хатын-кызларга да контракт төзергә рөхсәт ителә. Шулай ук Ленар Сәмигулла улы контрактчылар белән эшчәнлекнең районда уңай тенденциядә алып барылуын билгеләп узды.

- Өч айга план бирелгән иде. 90 процентка үтәдек. Ай саен икешәр-өчәр кеше хәрби комиссариатка килеп контракт төзеделәр. Узган вакансияләр ярминкәсендә ике ир-егет белән килешү төзедек. Алар хәзерге вакытта хәрби хезмәт үтәләр. Үзебезгә дә контрактчылар белән эшләүче белгеч кирәк. Югары белемле, хәрби хезмәттә булган ир-егетләр өчен бу вакансия ачык кала. Әгәр махсус хәрби операциядә катнашкан райондашыбыз бу эшкә алына икән, контракт төзүчеләргә бу хакта ул тулырак аңлата алыр иде,- дип белдерде журналистларга  Ленар Әхмәтҗанов.

Ләйсән ГАЗИЗОВА фотолары.