Горчица бәясе бодайныкыннан 3 тапкырга кыйммәт

              Бүген җыеп алынган икмәк чистартылып, иләп амбарларга салып куелды. Күчмә фонд белән бергә язгы чәчүгә 20 мең тонна, терлек азыгына 40 мең тонна икмәк әзерләнде. 4 мең тонна икмәк халыкка  пай җирләре өчен биреләчәк. 
          Язгы һәм көзге бодай, арыш, борчак, арпа белән беррәттән районыбыз хуҗалыклары өчен солы һәм карабодай төп игү культуралары булып тора. Солының уртача уңышы 14 центнерны, ә карабодайныкы 12 центнер тәшкил иткән. 
           Бөртеккә кукуруза, горчица, рапс, җитен культуралары да күпләп җыеп алынды.Техник культуралар игелә торган мәйданнарны арттыру базар мөнәсәбәтләре белән бәйле. Аларга сорау зур һәм бәя дә югары. Бодайның бер килограммы быел 17-20 сум булса, горчицаныкы 60 сумнан да арта.