Мөмкинлекләр бер булса да, нәтиҗәләр төрлечә

-Октябрь ае нәтиҗәләре буенча күрсәткечләр начар түгел,- дип искәртте район авыл хуҗалыгы һәм азык-төлек идарәсе башлыгы Дәниф Харисов, район терлекчелек тармагы эшчәнлегенә багышланган чираттагы киңәшмәнең тәүге минутларында. Шөкер, мал саны да, җитештерелгән продукциянең күләме дә берникадәр артуга таба.

Әмма, 8не асраганчы - симезне асра дип, халык белми әйтмәгәндер. Терлекчелек тармагының бүгенгесен искә алып, әлеге хак сүзләргә "сөтлене" дип тә өстәп куясым килә.

Район авыл хуҗалыгы һәм азык-төлек идарәсеннән ноябрь аеның тәүге көннәрендә алынган оператив мәгълүматларга караганда, район буенча хуҗалыкларда 9 меңнән артык савым сыерларының 7 проценты гына 20 килограммнан югарырак сөт бирә. Шактый савым сыерларының сөт бирүчәнлеге 10-15 килограмм белән чикләнә, андыйларның саны 3 меңнән артык. Гомумән алганда, 60 процент сыер көнгә 5-15 килограмм сөт бирә. Арада 3-5 килограммнан уздыра алмаган "әрәмтамаклар"ы да бар, дип әйтер идем, кызганыч, малның нәсел-нәсәбенә сылтап, аты-юлы белән сүгүдән генә сөт артмый, киресенчә. Аларга карата әйтәсе килгән сүзне башкаларга юллар идем мин.

-Зоотехниклар, бу - сезнең эшчәнлеккә бәя. Шуны да көйли алмагач, сезнең кирәк тә калмый..,- дип аны Дәниф Әсрар улы күптәннән ассызыклады инде.

Дөрестән дә, тиешле күләмдә сөт җитештерә алмауның төп сәбәбе кеше факторына барып тоташа. Бер үк фермада вәзгыять төрлечә була алмый. Ә хакыйкатькә килгәндә исә, нәкъ шулай. Мисал өчен, "Наратлы" ҖЧҖнең Чалманарат фермасында уртача көнлек савым 12,3, шул ук хуҗалыкның Шәбез бүлекчәсендә - 10,2, ә Гәрәй бүлекчәсендә 7,9 килограмм гына. Хәер, "Наратлы"да гына түгел, күп хуҗалыкларда хәлләр шулайрак. Нинди дә булса нәтиҗә ясауда мәгънә юк, бары тик уйланырга гына урын җитәрлек.