Актанышның «Без-бергә» волонтерлары: Бөтен көчне бергә туплап солдатларыбызга ярдәм итик!

"Без-бергә" волонтерлары активисты Фирдания Нуруллина чираттагы гуманитар ярдәм әзерләүнең бик акрын баруына борчыла.

- Бөтен көчне туплап, бергәләп ничек тә солдатларыбызга ярдәм җибәрә алсак иде. Бүген егетләребез көннән-көн авыррак уты эченә керәләр. Аларның хәрби бурыч үтәгән урыннары сату-алу нокталары, кибетләрдән ерагая. Элеккечә продукция дә, башка кирәк-яраклар да сатып ала алмыйлар. Хөкүмәт аларны карый, ашата, эчертә. Әмма бездән- туган яктан барган ризыклар, күчтәнәчләр алар өчен кадерлерәк һәм тәмлерәк. Егетләргә гуманитар ярдәм белән өй җылысы, өй назы килә. Битараф булмасак иде, райондашлар,- ди Фирдания апа.

Бүген махсус хәрби операциядәге сугышчыларга иң кирәклесе- су. Волонтерлар күп күләмдә бутылкадагы сулар туплаганнар, кечкенә шешәдәге суларга заказлар биргәннәр. Нәкъ менә кечкенә савыттагысы солдатларга кирәк тә инде- штурмга кергәндә алып кереп китәләр. Шулай ук төрле оста куллы, мәрхәмәтле ханымнар коры ашлар, үлән чәйләре әзерли.

"Без-бергә" волонтерлары фронттан тыш яралылар дәвалана торган госпитальләр белән дә элемтәдә. Госпитальләргә азык-төлек, токмач, ярмалар кирәк. Шулай ук сәламәтлекләренә зыян килгән солдатларга кием-салым, памперслар, постель кирәк-яраклары, мендәрләр җитми.

Гуманитар ярдәм элеккечә "Яшьлек" яшьләр үзәгендә җыела. Үзәкнең ишекләре, шимбә-якшәмбедән кала, 08:00-16:00 сәгатькә кадәр һәркөнне ачык. Волонтерлар төшке аш вакытында да эшлиләр.

Шулай ук солдатларга кирәк-яракларны "Бакчачы" кибетендә һәм "Ихлас гамәл" үзәгендә дә кабул итәләр. 

Бүген Актаныш районы башлыгы Ленар Зарипов  "Без-бергә" волонтерлары белән очрашты. Чираттагы гуманитар ярдәмне озату буенча фикер алышу узды.